Қазақстан мен Ресей утильалымының айырмашылығы бар ма?

ҚР Индустрия және инфрақұрылымдық даму вице-министрі Марат Қарабаев көршілес Ресейде қалыптасқан кәдеге жарату алымын төлеу тетігі туралы айтып берді, деп хабарлайды Egemen.kz.

«Ресей Федерациясының өндірушілері мемлекеттік қолдау аясында белгіленген механизмді қолданады. Мәселен, Қазақстан өндірушісі алдымен өзі ақша төлеп, содан кейін ғана өз ақшасын кері қайтарады. Ресей өндірушілері мүлдем төлемейді. Яғни олар қағазды көрсетіп, былай дейді: «Біз өндірдік, ал сіздер бұны кәдеге жарату алымын төледік деп есептейсіздер», деді Марат Қарабаев ОКҚ брифингінде.

Ол өз ойын былай жалғастырды.

«Ресей Федерациясында көлік экспортқа шыққанда, экспорттаушы төлейтін кәдеге жарату алымын мемлекет субсидиялайды. Үшінші - автокөлік импортынан түскен қаражат автоөнеркәсіпті тікелей қолдауға бағытталады. Атап айтқанда, онда қосалқы бөлшектерді оқшаулауды ұйымдастыру үшін арзандатылған несие беріледі. Өкінішке қарай, біз мұндай қолдау көрсетпейміз», деп түйіндеді вице-министр.