«Ұлттық салт-дәстүріміз, тіліміз бен музыкамыз, әдебиетіміз, жоралғыларымыз, бір сөзбен айтқанда ұлттық рухымыз бойымызда мәңгі қалуы тиіс».Н.Назарбаев.Ұлттық құндылықтар – тәрбиенің түп қазығы. Қоғам­ның бас­ты мақсаты – ұлттық сана-сезімі қалыптасқан, ұлт­тық мүдденің өркендеуіне үлес қоса алатын ұлттық құн­дылықтар мен жалпы аза­маттық құндылықтарды өзара ұштастыра алатын ұлтжанды тұлғаны тәрбиелеу. Ал, бұл рет­те көп еңбек сіңіретін ұстаздар қауымы. Осы орайда, жуырда педагог мамандар арасында Елбасының «Болашаққа бағдар: рухани жаңғыру» бағдарламалық мақаласын жүзеге асыру мақсатында «Ұстаз – өзгерістер елшісі» кіші жобасына сәйкес, «Ғашықтық жырлардағы ұлттық құндылықтар» атты облыстық байқау өтті. Жаңақорған ауданы, Жайылма ауылында бас қосқан облыстық «Рухани жаңғыру» орталығының өкілдері, Қорқыт ата атындағы Қызылорда мемлекеттік университетінің оқытушылары, Жаңақорған ауданының білім бөлімінің қызметкерлері мен педагог мамандар халықтық мәні бар, тағылымы мол «Қозы Көрпеш-Баян Сұлу», «Қыз Жібек», «Айман-Шолпан» жырларындағы ұлттық құндылықтарды танып, рухани азық алды.
Аталған жарысқа облыстан, Жалағаш, Шиелі, Жаңақорған, Қармақшы, Арал, Қазалы аудандарының атынан командалар қатысты. Байқау кезеңдері бойынша қатысушылар өздерін таныстырып, жоғарыдағы жырларда кездесетін салт-дәстүрлер бойынша сұрақтарға жауап беріп, ұлттық қолөнер бұйымдары негізінде көрме ұйымдастырды және 5-7 минут аралығында жыр-дастандардан үзінді оқыды. Әр ауданның намысын қорғаған командалар өз дәрежесінде өнер көрсетіп, білім-біліктерін сынға салды. Жалағаш ауданының атынан барған Мырзабай ахун ауылындағы №122 орта мектеп мұғалімдерінен құралған «Сырғалым» командасы үздік деп танылып, жүлделі І орынға ие болды. Команда құрамында орта мектеп мұғалімдері Шұғыла Дүйсебаева, Айгүл Әбдіқалықова, Құралай Мамзадаевалар бар. Жеті команда ішінен ерекше көзге түсіп, аудан мерейін асырған жерлестеріміздің жеткен жетістігі біз үшін мақтаныш. №122 орта мектеп мұғалімдері байқау қорытындысымен Қорқыт ата атындағы ҚМУ-дың І дәрежелі дипломымен, Қызылорда облысы білім басқармасының «Алғыс хатымен» және облыстық «Рухани жаңғыру» орталығының І дәрежелі дипломымен марапатталды.
Біздің міндетіміз – экономикамен қатар, ұлттық құн­дылық­тарымызды дамытып және сақтай отырып әлемдік қауымдастыққа кірігу. Осы ретте, баршамыз ел Президентінің рухани жаңғыру жолындағы бағыт-бағдарын ұстанып, жаһандану дәуірінде мақсатымызға жетуге күш салуымыз керек. Әрбіріміз ұлттық құндылықтар – ұлттың тірегі екенін ұмытпайық!