Өңір дамуының, облыстың әлеуметтік-экономикалық жағдайының жақсаруы жолында атқарылған жүйелі жұмыстар мен келелі істер көңіл қуантады. Халық үшін ең маңызды сала – денсаулық сақтау саласында біраз жетістік, ауқымды шаралар жасалды. Облыс бойынша апатты жағдайдағы ғимараттардың орнына 49 денсаулық сақтау нысаны салынды.

Қай кезде де халық саулығы бас­ты орында тұруы тиіс. Бұл бағытта Жалағашта толымды тірлік бар. Ең алдымен, ауылдық жерлерде алғашқы медициналық-санитарлық көмектің қолжетімді болуы үшін жағдай жасалды. 2015 жылы аудан орталығынан жаңадан типтік жобадағы емхана бой көтеріп, пайдалануға берілді. Үш қабатты ғимарат заман талабына сай жаңа медициналық құрылғылармен жабдықталған. Ауысымына 250 келу­шіге қызмет көрсетуге толық мүм­кіндік жасалған. Емханада аудан жұртшылығын спирография, электроэнцефалография, холтерлік мониторлау тексерулерінен өткізу де қарастырылған. Заманауи құрал-жаб­дықтармен қамтамасыз етілген ем­­­­ха­надағы қызмет көрсету сапасы­­ бұ­рынғыдан едәуір жақсарған әрі бар­­­­­­лығы қолжетімді. Орталық ауруха­­нада да дәрігерлердің жұмысын же­­ңілдету үшін, оларға тез әрі дұрыс ше­­­шім қабылдауына септігін тигізетін меди­­­циналық аппараттар жеткілікті. Электролиттерді жедел анықтайтын ап­парат арқылы қан құрамына талдау жа­салады. Бұл аппараттың тиімділігі сонша, 2-3 секунд ішінде қажетті ақпаратқа қол жеткізуге болады. Одан соң, науқасты өкпені жасанды желдету аппаратымен демалдырып, тыныс алуын тоқтатуынан сақтандырады. Өздеріңізге белгілі, былтырғы жылға дейін емханаға келушілер меди­циналық кітапшасын арқалап, кезекке тұрып жүретін. Содан соң дәрігердің қорытындысын кітапшасына жазып бергенше тағы күтетін. Бұл уақыт шығынын келтірсе, бір жағынан кей науқастардың денсаулықтарына кері әсер ететін. Қазір бұл қиындық артта қалды. Барлық емханалар мен ауруханалар медициналық құжаттарды қағазсыз, цифрлық нұсқада жүргізуде. Денсаулық сақтау саласын цифрландыру, заманға сай аппараттармен толықтыру халыққа тиімді әрі сапалы қызмет көрсетуге жол ашуда.

Саланың дамуы жолында сырқ­атына ем, жанына дәру іздеген­дердің дертіне дауа, көңіліне демеу болатын денсаулық сақшыларының да еңбегі зор. Мәселен, ауданның денсаулық сақтау саласында аудан бойынша халық денсаулығын қорғауда қосқан зор үлесі, ұзақ жылғы адал қызмет атқарғандары үшін әр жылдары 16 медицина саласының қызметкері «Ден­саулық сақтау саласының үздігі» төс белгісінің, мекеменің қаржы саласының 2 қызметкері «Денсаулық сақтау ісіне қосқан үлесі үшін» төс белгісінің, 1 дәрігер «Ерен еңбегі үшін» медалінің, сондай-ақ 2 медициналық қызметкер «Конституцияның 10 жылдығына», «Тәу­елсіздіктің 20 жылдығына» арнал­ған мерекелік медальдардың иегерлері атанды. Айта кету керек, ауданның емдеу мекемелерінде 88 дәрігер, 466 орта буын медицина қызметкері жұмыс жасайды. 10 мың тұрғынға шақ­қанда дәрігермен қамтылу – 26 пайыз­ды құрайды. Өткен жылмен салыс­тырғанда 2 пайызға жоғарылап отыр.

Мұнан бөлек, былтырғы жылы денсаулық сақтау саласының мате­риалдық-техникалық жағдайын қамта­масыз ету мақсатында Жаңа­дария, Бұқарбай батыр және аудандық емха­наның шұғыл бөліміне жедел-жәрдем автокөліктері пайдалануға берілді. Бұқарбай батыр, Аққұм және Дәуімбай елді мекеніндегі дәрігерлік емханаларына ағымдағы жөндеу жұмыстары жүргізілді.

Жалағаштықтарды қуантқан жағым­ды жаңалықтар мұнымен толас­тамақ емес. Биылғы жылы аудан орта­лығынан типтік жобадағы жаңа аурухананың құрылысы басталады. Ауданға ең қажетті нысандардың бірі – Жалағаш аудандық орталық ауруханасының бой көтеруі жергілікті халық жағдайының жақсаруына, науқастардың сапалы ем-дом алуына мол мүмкіндік жасамақ. Қазіргі таңда жалпы құны 4 млрд теңгені құрайтын құрылыс нысанына 500 млн теңге қаражат бөлінді.

Аудан халқын қуантқан жағымды жаңалықтар, келелі істер мен байыпты бастамалар жарасымды жалғасын табады деп сенеміз.