Жазушы Әбдіжәміл Нұрпейісов өмірден озды

Жазушы Әбдіжәміл Нұрпейісов қайтыс болды. Бұл туралы Мәжіліс депутаты Жанарбек Әшімжан әлеуметтік желідегі парақшасында естіртті.

«Классик жазушы, ІІ-Дүниежүзілік соғыстың ардагері, даңқты Әбдіжәміл ақсақал Нұрпейісов қайтыс болыпты. Иман байлығын берсін. Адамзаттың басынан өткен небір сұрапыл дәуірлерді тәнімен де, жанымен де сезінген Алып Жүрек ғасырға жақындап барып тоқтапты. Көрмеген көшесінен жарылқасын» деп жазды  Жанарбек Әшімжан Facebook-те.

Әбдіжәміл Кәрімұлы Нұрпейісов 1924 жылы 22 қазанда Қызылорда облысы, Арал ауданының Құланды поселкесінің Үшкөң ауылында дүниеге келген. Ол Қазақстанның халық жазушысы, XX ғасырда қазақ әдебиетіне зор үлес қосқан суреткерлердің бірі, қоғам қайраткері.

Әбдіжәміл Кәрімұлы Нұрпейісов – қазақ әдебиетіне зор үлес қосқан белгілі жазушы, аудармашы. Ұлы Отан соғысының ардагері. Әбдіжәміл Нұрпейісов 1924 жылы 22 қазанда Қызылорда облысында дүниеге келген. Ол «Курляндия», «Қан мен тер» сияқты танымал романдар жазды. Нұрпейісовтің ең әйгілі шығармасы – «Қан мен тер» трилогиясы 30 шет тіліне аударылып, шетелдік әдебиеттанушылар тарапынан үлкен құрметке ие болды. Романның әдеби сценарийі бойынша көркем фильм түсірілді.

2019 жылы ол өзінің 95 жылдығын атап өтті. Кейін Президент оған арнайы белгісін табыс етті. Тоқаев Нұрпейісовке: «Сіз халқымызға керексіз» деген еді.

1941-1945 жылдардағы Ұлы Отан соғысы ардагері, Оңтүстік және Прибалтика майданында, Луганск түбінде миномёт ротасында саяси қызметкер, кейін штабист ретінде Балтық маңында Курляндия плацдармындағы шайқастарға қатысқан.

Оның  «Қан мен тер» трилогиясы, «Соңғы парыз» дилогиясы Нұрпейісовтің ғана емес, күллі қазақ әдебиетінің табысы. Жазушының ерен еңбегі елдің, мемлекеттің жоғары бағасына ие болды. Жазушы ретінде «Еңбек Қызыл Ту», «Құрмет белгісі», Қазақстан мемлекетінің «Отан» орденімен марапатталған.

Ол – КСРО Мемлекеттік сыйлығының лауреаты. Бұл мәртебелі сыйлықты жазушылардан Қазақстанда үш қаламгер: Мұхтар Әуезов, Әбдіжәміл Нұрпейісов, Жұбан Молдағалиев қана алған.