Орталық алаңда «Саламатты сандарға қол жеткіз!» ұранымен «Денсаулық фестивалі – 2018» акциясы өтті.

Шараны «Нұр Отан» партиясы аудандық филиалы төрағасының бірінші орынбасары Қаншагүл Мұстафаева ашып, халық денсаулығын нығайтуға, саламатты өмір салтын ұстануға бағытталған акцияның маңыздылығына тоқталды.

Айта кетейік, 3-8 қыркүйек ара­лығында «Денсаулық фестивалі – 2018» акция­сына орай, аудандық емханада ашық есік күні сондай-ақ, оқушылар, студент­тер, тұрғындар арасын­да мә­де­ни-спорттық ойындар ұйым­дас­тырылған болатын. Қоры­тын­ды­сы бо­­йынша жарыс жеңім­паздары мен акцияға белсене қатыс­қандар марапатталды.

Еліміздің ұзақ мерзімді «Қазақ­с­тан-2050» даму стратегиясының ең ма­­­­ңызды басымдылықтарының бірі денсаулық, білім алу мен Қазақстан аза­маттарының әл-ауқатын арттырып, салауатты өмір салты мәдениетін қалып­тастыру болып табылады. Осы орайда бүгінгі фестивальдің берері мол. Акцияның мақсаты – жұртшылықты салауатты өмір салтын ұстануға шақырып, қоғамның, бұқара халықтың назарын аудару, – дейді ұйымдастырушылар.

Орталық алаңға жиылған көпшілік жаппай жаттығу жасап, бойларын бір сергітіп алды. Сонымен бірге, еріктілер мен медбикелер флешмоб билеп, түрлі қимылдар арқылы да салауатты өмір салтын қалыптастыруға үндеді. Мұнан бөлек, жас спортшылар шеберлік байқасып, «Денсаулық қалашығы» тұр­ғы­зылды.

Әсіресе, жиылған жұртшылық ау­дан­ның жас таеквондошыларына толас­сыз қошемет соғып, өнерлерін жоғары ба­ғалады. Олардың бірі 2-3 метр биік­тіктегі құтыны аяғымен теуіп түсірсе, ен­ді бірі шеберлігімен көзге түсті.

Арнайы құрылған «Денсаулық қала­шы­ғында» аудан тұрғындары мен қо­нақ­тары медициналық жолдамасыз-ақ дәрігерлерге қаралып, түрлі диаг­нос­ти­калық тексерулерден өтіп, тегін жедел-анализдер тапсыруға мүм­кіндік алды. Шара соңы түрлі мә­дени-концерттік бағ­дарламаларға ұласты.