Аспаннан сауылдап құйылып, санаң мен қантамырларың арқылы өн бойыңа тарағанда көз алдыңа жазиралы даланы, байырқалы байтақты емін-еркін жайлап, бие байлап, құлын ойнап, қымызын пісіп, сабасын сапырып, жүйрік мініп, ат баптап сән-салтанаты жарасып, мамыражай ғұмыр кешіп жатқан бақуат тұрмыстағы халық елестейді. Бұл – кәдімгі қазақтың көмейіне ғана қонақтаған қоңыр үн, қара домбырадан ғана төгілетін қоңыр әуез. Ұлт руханиятының тамырын бүгінмен байланыстырып тұрған да осы қоңыр үн мен сиқырлы саздың құдіреті.

Олар сахнаға көтерілгенде кө­рермен қошеметінде шек бол­майды. Домбыра шанағындағы күй күмбірі зал ішін кернегенде бір сәт бойдағы қазақтық қаның тулап, көкірегіңнен намыс пен рух атойласа, енді бірде зар заманның мұңлы әуеніне жан-жүрегің езіліп, мүлгіп кетесің. Ыс­қы­шынан бебеулеген қобыз сарыны да қиялыңды мәң­гілікке қа­рай ша­рық­тата жөне­леді. Бұл – Қ.Қазан­таев атын­­дағы аудандық мәде­неиет үйі жанынан құрылған «Жігер» этно-фольклорлық ан­самблі.

Аталған ансамбль 2017 жыл­дан бастап жұмыс істеп келе жатыр. Құрылғанына көп уақыт бол­маса да, шығармашылық ұжым мүшелерінің дарын, таланты мен кәсіби шеберлігінің және ізденім­паз­дығының нәтижесінде облысқа, республикаға танылып үлгерді.

– Бұл бастама Елбасымыздың «Болашаққа бағдар: рухани жаң­ғыру» бағдарламалық мақала­сы­ның негізінде жүргізілген «Рухани қазына» кіші бағдар­ламасының «Мә­дени мұра» базалық бағытының аясында іске асырылды. Этно топ қазақтың ұлттық домбыра, шаң­қобыз, даңғыра, шылдырмақ, саз­сырнай, қобыз, сыбызғы, тұяқ, асатаяқ секілді аспаптарында ой­­найтын өнерлі жастардан құ­рал­ған. Қазірде "Жігердің" қор­жы­нында Шалмырзаның «Мереке», Жалдыбайдың «Қара жорға», со­нымен бірге Курбанионның «На­войь Шарк» және қырғыз хал­қының «Маш­батой» секілді күйлері бар. Атауы айтып тұрғандай, біз му­зыка жанрының халықтық бағыты бойынша жұмыс жасаймыз. Мақсаты­мыз – ұлттық өнерді дәріптеу, мә­дени мұрамыздың ойсырап қал­­ған орнын толтыру, халықтың рухын ояту. Күн өткен сайын өнер ұжы­­мының материалдық базасы нығайып келеді. Өнерпаздардың сахналық киімдері жаңарып тұруы тиіс. Өйткені көрермен сахнаның адамын ең алдымен үстіндегі киіміне қарап қабылдап, баға береді. Сондықтан біз де сол көрермен көңілінен шығуға тырысып, концерттік шараларға мейілінше киімімізді жарқыратып, жаңалап шығуға тырысып бағамыз. Әрине, шығармашылығымызды да сәт сайын шыңдап, жетілдіріп отырамыз. Өнер адамы қанша талантты бол­ғанымен, еңбектенбесе, ізден­бесе өзін ол ортадан мүлдем жоғалтып алады. Тұрмыстық тілмен айтқанда, талантын өлтіреді. Сол үшін біз өзімізге қатаң талап қоямыз. Әсіресе бізге дайындық барысында босаңсуға болмайды, – дейді ан­самбль жетекшісі Руслан Бурабай.

«Жігер» этно-фольклорлық ансамблінің жетістіктері де жоқ емес. Биыл Тараз қаласында өткі­зілген «Көне Тараз күмбірі» атты І республикалық этно-фоль­клорлық ансамбльдер конкур­сында Ықылас Дүкенұлының «Ар­найы жүлдесін» иеленіп, 100 мың теңгелік сертификатқа ие бол­ды. Айта кетейік, бұл байқауға елі­міз­дің барлық өңірлерінен белгілі ансамбльдер қатысты. Солардың ішінен арнайы жүлдеге ие болу – күні-түні төгілген тердің жемісі. Сонымен бірге аталған ансамбль жақында ғана аймағымызда ұйымдастырылған түр­кі­тілдес елдердің «Қорқыт және Ұлы дала сазы» халықаралық фоль­клорлық-музыкалық өнер фес­ти­ва­лінде өнер көрсетіп, арнайы «Ди­пломмен» марапатталды. "Жігер­дің" жетекшісі ансамбльдің құра­мы ал­дағы уақытта да өнер жолында жүр­ген таланттармен толыға бере­тінін айтады.

Иә, өнер жолы – қиын жол. Со­ның ішінде ата-бабадан қалған мә­дени мұраны тірілтіп, оны ұрпаққа насихаттау, ұлт руханиятының қуа­рып қалған тамырына нәр беру үшін аз тер төгілмейді. Бұл жолда бойыңдағы бар қуатыңды сарқып, уақытыңды құрбандыққа қиюға тура келеді. Сонда ғана өзіңе деген қошеметі мен ықыласы ерекше кінәз кеуделі һәм кінәмшіл көңілді көрерменге тек бір сәттік демалыс сыйлап қана қоймай, олардың жан әлеміне көне күндердің сәулесін түсіріп, қалғып бара жатқан рухын сілкіп тұрасың.