Кеңес әскерінің Ауғанстан жерінен шығарылғанына 31 жыл толды

Ең алдымен жиылған қауым Жалағаш кентіндегі Тағзым аллеясына гүл шоқтарын қойып, ауған соғысында қаза тапқан азаматтарға құран бағыштап, өздеріне беймәлім жат ел үшін қан төгіп, қыршын болған ауғандық жауынгерлерді 1 минут үнсіздікпен еске алды.

Қаралы митингте аудан әкімінің орынбасары Жағыпар Тажмаханов, «Ауғанстан және аймақтық соғыс ардагерлер кеңесі» қоғамдық бірлестігінің төрағасы Мұрат Алдамбергенов сөз алып, ауған соғысының адамзатқа тигізген зардабы, соғыста қаза тапқан азаматтар туралы айтты.

Шара Мәдениет және өнерді дамыту орталығында ауған соғысы туралы түсірілген кинокөрсетіліммен жалғасты.

Айта кету керек, ауған соғысына Қызылорда облысы бойынша 800-ге жуық адам аттанса, Жалағаш ауданынан 34 адам қатысқан.
2018 жылы аудан орталығындағы «Тағзым» аллеясында Ауған соғысына, Семей, Чернобыль апаты зардаптарын жоюға қатысушылардың құрметіне арналған ескерткіш бой көтерген болатын.