Қазірде елімізде құқық қорғау қызметінің халықаралық стандарттарға сәйкес келетін жаңа жүйесі қалыптасты. Соған сәйкес полицияға қойылатын талап пен тәртіп те күшейді. Олар кәсіби қызметіне адал, сонымен бірге білімді, білікті, білекті һәм жүректі бо­луы шарт. Өйткені кез келген по­лиция өзінің қызметтік міндетіне сәйкес заңдылықтың сақталуын қада­ғалауда, қылмыстың алдын алуда көптеген қиындықтарға тап болады. Тіпті кейде қоғамда орын алатын түрлі қылмыстық оқиғалар мен қақтығыстар барысында адам өмірін арашалап қалу үшін өз басын қатерге тігуге тура келеді. Жоғарыда айтқан полиция қызметкерінің бойында болуы керек қасиеттер осындай сәтте жарқырап көрінуі тиіс.

Жалағаш аудандық полиция бө­лімінің қызметкері, полиция майоры Нұрлан Сенбековтің бойында осы қасиеттердің барлығы бар. Нұрлан Қызылорда қаласындағы «Болашақ» университетін заңгер мамандығы бойынша бітірген соң өзі армандаған қызметіне орналасып, алға қойған мақсатын айқындады. Осы аталған салада қызмет істеп келе жатқанына биыл 11 жыл болыпты.

Нұрлан – нағыз полиция қызметкері. Спортшы. Гір тасын көтеруден облыс чем­пионы. Жойқын қара күш иесі. Аудан, облыс орталығында өтетін ұлттық мере­келер мен көпшілік шараларда өнер көрсетіп, жұрт қошеметіне бөленіп жүр. Соның бір айғағы, осыдан бірнеше жыл бұрын әлеуметтік желіге жылқыны мойы­нына салып тұрған суреті жа­рияланғанда желі қолданушылары «Қажымұ­қанның ізбасары шықты» деп таңғалысып, шын қуанған еді. Нұрлан Сенбеков өз қызметіне үлкен жауап­кершілікпен қарайды. Осы уақытқа дейін бірнеше ауылдық округте учаскелік инспектор қызметін атқарған. Ол жайында Нұрланның өзі:

– Аудан орталығынан шалғай орна­лас­қан ауылдарда қоғамдық тәртіпке қа­тысты көп мәселе бар. Тіпті кейде бір күнде ірілі-ұсақты бірнеше қылмыстық оқиға тірке­летін кездер болады. Әрине, ел болған соң тентек, телісі бар. Бірақ ауылдағы тәр­тіпсіздік пен ұсақ-түйек қылмыстық істердің көбі ақсақалдардың араласуымен, ағайын арасындағы өзара келісіммен жабылып қалады. Негізінен ауылдық жер­лерде көп орын алатын қылмыстар – мал ұрлығы. Қорадан ұрланған мал шұғыл іздестіру тобының тынымсыз жұмысының нәтижесінде ізі суымай табылады.

Ал өріс­тен жоғалған малды табу қиынға со­ғады. Полицияның мін­деті – қыл­мыстың алдын алу және сол арқылы халықтың қауіпсіздігін қамта­масыз ету, дер кезінде оқиға орнынан табылу. Сондықтан ауыл халқының өріс­тен барымталанған малдары да әріп­тестеріммен бірігіп жа­саған әбжіл әрекетіміздің нәтижесінде ие­сіне қайта­рылады. Әрине, мұның барлығы да тек айтуға ғана оңай. Шын мәнінде қылмысты іздестіру барысында менің әріптестерім күні-түні еңбек етеді, түрлі қиындықтарды басынан өткізеді. Тіпті кейде басын қауіп-қатерге байлайды. Бірақ, таңдаған мамандығымыз болған соң кәсіби қызметімізде кездесетін қиындықтардан айналып өтуге қақымыз жоқ. Олай етсек, халықтың сеніміне сызат түсіреміз және ол біздің қызметімізге ғана нұқсан келтіріп қоймайды, сонымен бірге адамдығымызға, азаматтығымызға да сын. Өйткені біздің басты міндетіміз – қоғам тыныштығын күзетіп, халыққа қапысыз қызмет ету, – дейді.

Иә, Нұрлан өз кәсібінің биігінен көрініп жүр және қызметінде аса белсенді. Екі жыл облыстық ішкі істер басқармасына қарасты жылдам қимылдайтын арнайы жасақта қызмет етті. Қазірде Мәдениет ауылында аға учаскелік полиция инспекторы сонымен бірге Мырзабай ахун, Темірбек Жүргенов, Жаңаталап, Аққыр ауылдарындағы учаскелік полиция қызметкерлерінің жетекшісі. Бұл сақшыға үлкен жауапкершілік жүктейді. Сондықтан да ол үнемі өзін жан-жақты жетілдіріп жүреді.

Қызметін абыроймен атқарып келе жатқан Нұрлан Сенбеков өзінің қызметтік жолында әр жылдары аудан, облыс әкімдерінің және Қазақстан Республикасы Ішкі істер министрінің «Алғыс хатымен» марапатталды. Сондай-ақ ол өз саласында тер төгіп атқарған адал еңбегінің нәтижесінде 2014 жылдың қорытындысымен әріптестерінің арасынан қара үзіп шығып, облыс бойынша «Үздік сақшы» атанды. Осындай қоғамдық тәртіптің сергек сақшылары барда ел ішінің тыныштығы шайқалмайды.