Күз – береке мен молшылықтың бастауы. Бұл – дала еңбеккерлерінің жұмысы қыза түсетін мезгіл. Күріштің суын тартқаннан бастап, диқандар орақ, шалғысын шарыққа салып, қамдана бастайды. Диқанның қамбасы толық болса, халықтың да көңілі жай, қарыны тоқ. Биыл егістік жерлердің біршама аумағы қысқарды. Оның үстіне дән жерге түскен уақытта аяқсу тапшылығы бүйірден қысты. Бірақ ондай қиындықтар шаруалардың меселін қайтарған жоқ, керісінше кетпен ұстаған қауым ширай түсті. Биыл диқандар жылдағыдан екі есе еңбектенді. Сондықтан олар мол өнімнен үмітті. Алқаптағы күріштің шығымына көңіл тоғаяды.

Өткен аптада Ақсу ауылы алғашқы орақты бас­тады. Кәсіпкер, инвестор, "Ақбостай", "Иіркөл" шаруа­шы­лықта­ры­ның төрағасы Абай Боран­құлов Сыр са­лы­сын егуді осыдан екі жыл бұ­рын қолға алған екен. Жылдан жыл­­­ға кәсібін ұлғайтып келеді. Биыл Ақ­су ауылдық округінен 400 гектар, "Ақ­бос­тайдан" 250 гектар, Бұқарбай ба­тыр ауылдық округінен 100 гектар, Ала­ме­сек ауылдық округінен 100 гектар және Қармақшы ауданынан 400 гектар жерге күріш екті. Дән түскен топыраққа ерекше күтім керек. Көктеп тұрған түйір дәннің әрбірінде күрішшілердің жаз бойы атқарған еңбегі, тамшылаған маң­­дай тері бар. "Ақбостайдағы" кү­ріш­тің шығымы жақсы. "Егінші жылда ар­манда".

Бұйыртса, Абайдың егіс алқа­бынан биыл да Сыр маржаны ақтарылғалы тұр.

Таңертеңмен "Ақбостай" учаскесіне аудан ақ­са­­­­қалдары мен дала еңбек­керлері жиналды. Хал­қы­мыз­да қандай да бір игілікті іс бастарда ақса­қал­дар­дан бата алып кірісетін жақсы үрдіс бар. Ра­сында, үл­кендердің алғыс, батасымен көгеріп, көк­теген ха­лық­пыз ғой. Абай да жылда сол жолдан жаңыл­май­ды. Егіс даласында еңбек дүбірі басталып, жерге дән тас­тайтын мезгілде және сол дән мыңдап көбейіп, піскен егіске орақ саларда қариялар мен ел ағаларын шақырып, батасын алады.

Егіс даласындағы салтанатты рәсім ырысы та­сы­ған мезгілдің берекесін арт­тыра түсті. Алтын ас­тыққа бөгіп қалған алқапқа күн салып қарап тұрған қариялар: "Бәрекелді! Адал еңбектің, маңдай тердің жемісі деген осы ғой! Абай балам, өркенің өссін! Өнімің мол болып, қырманың тасысын, қамбаң дәнге толсын! Ердің еңбегі де, ерлігі де елге ортақ", – деп кезек-кезек риза­шы­лықтарын білдіріп, алғыстарын жаудырды.

Аудандық ардагерлер кеңесінің төрағасы Садық Әлиев сөз сөйлеп, күрішке алғашқы орақ салу рә­сі­мін салтанатты түрде ашты. Одан соң Жанұзақ Оспан, Серік Балымбетов ақсақалдар “ел іші тыныш болсын, заманымыз тоқшылық болсын" деген ниетте жақсылыққа жиналған қауымға ақ ба­та­сын берді. Егіс басындағы сал­танатты шараға Ақсу ауылдық округі әкімі Қанат Ниетқұлов, кент арда­герлер кеңесінің төрағасы Қожатай Құлмахан, ел ағасы Кенжеғара Сүлейменов және ар­дагерлер мен дала еңбек­керлері қатысты.

Қазірде "Ақбостай" шаруашы­лы­ғы­ның техни­ка­­лық базасы түгелге жуық жаңарған. "Магдон", "Джон Дир" секілді заманауи комбайндар жұ­мыс өнімділігін арттырған. Шаруа­шылықтың басқа да техникалық күштік құрамы жаңадан жасақталыпты. Шаруашылықта техника күші де, жұмысшы күші де жеткілікті. Ілгерідегілер "егін салмас бұрын, сай­ма­ның­ды сайла" деп бекерге айтпаса керек.

– Шаруаның адамына көктемде егіс даласына шыққаннан күзге дейін тыныштық жоқ. Тіпті олар үйі­не де қонбай, көбіне дала қосында түнейді. Олай ет­песе, өнім болмайды. Өнім болмаса, тек шаруа ғана емес, халық зардап шегеді. Сондықтан біз ала­жаздай аттан түспейміз. Дән қамбаға түскенде ғана тақым суытамыз. Биыл аяқсудың қиындығы болды. Алайда еңбектенсең, қандай қиындықты да еңсеруге болады, – дейді Абай Боран­құлов.

"Ақ­бос­­тайлықтар" жиым-терім нау­қанын қазан айы­ның ортасына таяу толық аяқтап, 1 250 гектар Сыр са­лысының әр гектарынан 60-70 цент­нерден өнім ала­мыз деп межелеп отыр. Сондай-ақ Абай Боранқұловтың кент орта­лы­ғында 60 адамды тұрақты жұмыспен қамтып отырған ауқымды базалық кешені бар. Ауылыма бол­сын дейтін кәсіпкер келер жылы Ақсу ауылынан құны 200 млн теңгені құрай­тын күріш ақтау зауыты мен жем өң­дейтін цехтың құрылысын бастағалы отыр. Жоба жү­зеге асқанда ауылдағы жұмыссыздық мәселесі бір­жақты шешіліп, ауыл экономикасына қуатты қол­дау болары сөзсіз.

– Елдің ертеңі – жастар. Ауылдың да болашағы осы жастарға тікелей байланысты. Алдындағы ақ­са­қалдар, ағалар ақылын айтады, үлгі-өнеге көр­се­теді, ал соны бойына, сіңіріп, алдыңғы буын­ның жарқын ісін жалғау – кейінгі жастарға сын. Мен үнемі айтып жүремін, қазіргі жастардың қай жағынан болса да әлеуеті жоғары. Білімді, ең­бекқор, нарық заманына бейімделген. Солардың ішінде Абай көптеген жастарға үлгі болуы тиіс. Бас­қа­сын айтпағанда, жас болса да заманға лайық жұ­мыстың көзін тауып, үлкен кәсіпке тәуекел ет­кен батылдығының өзі жұртты сүйсіндіреді. Оның еңбекқорлығы, ел­ге­зектігі, кішіпейілдігінен бөлек, кә­сіп­керлік саласындағы тәжірибесі мен эко­номикалық білім-білігі де жеткілікті. Қазір кә­сіп­пен айналысатын жастар көп. Алайда Абай­дың солардан бір сүйем артықшылығы бар. Ол – ауылына көңіл бөліп, туып-өскен топырағын түлетуге бет бұруы. Жас та болса бас болып, ауыл тұрғындарын жұмыспен қамтып, жалақысын беріп отырған аза­мат­тың елге тигізіп жүрген пайдасы, "еңбегім елге ортақ" деген пейілі бізді, елдегі ақсақалдарды қуантып, көңілімізді өсіреді. Біз адал еңбегімен жетістікке жетіп, табысқа кенеліп жүрген осындай жастарға әрдайым тілекшіміз, – дейді Кенжеғара Сүлейменов.

Өзінің айтуынша, Абай Боран­құ­лов­тың ал­да жоспары көп. Соның бірі – ауылдан, аудан ор­­та­­лы­ғы­нан тұрғын­дар сұранысына сәйкес ха­лыққа са­па­лы қызмет көрсететін заманауи ор­­та­лықтар ашу. Расында қазірде шаш­тараз, сән салоны, дә­рі­хана, балаларға арналған ойын ав­томаттары, сау­да орын­дары көбейді. Алайда, халықтың рухани сұ­ра­­нысын өтейтін орталықтар жоқ. Сондықтан тек жеке пайдасын көздеп жұмыс істемейтін жас кә­сіп­­кердің халықтың, жас ұрпақтың рухани толы­ғуы­­на ықпалы тиіп жатса, нұр үстіне нұр болар еді. Со­ны­мен бірге Абай Боранқұлов алдағы уақытта мал шаруашылығын да қолға алып, аудан халқын сапалы ет-сүт өнімдерімен қамтамасыз етпек.