Сыр өңірінде кәсіпкерлікті қолдаудың ерекше үлгісі қалыптасқан. бұған дәлел ретінде Аймақта 2018-2020 жаппай кәсіпкерлікті қолдаудың үш жылдығы жарияланғанын атап өтуге болады. бұл өз кезегінде кәсіп ашамын деген талай азаматтың іс бастауына тың серпін берді. Мемлекеттік қолдау аясында өңірдегі кәсіпкерлік нысандары жуырда тағы бір сән салонымен толықты.

Кент орталығынан ашылған «Сезім» сән салоны қыз-келіншектерге қызмет көрсете бастады. Жаңадан ашылған сұлулық салонында кәсіби білікті мамандар жұмыс жасайды. Олар бет әрлеу, шаш сәндеу, қас-кірпікті әсемдеу және тағы басқа да көптеген қызмет түрін көрсетеді.

Сән салонының иесі Мереке Қалымбетова бұған дейін «Нәтижелі жұмыспен қамту және кәсіпкерлікті дамыту» бағдарламасы бойынша «Шаштараз-модельер» мамандығында оқып, біраз уақыт тәжірибелі мамандардан дәріс алды, біліктілігін шыңдады. Есесіне, қазір ойға алған ісін бастап, алға қойған мақсатына жетті.

– Бұл кәсіпке келмес бұрын арнайы курстарда оқыдым. Басқа салондардың жұмысымен таныстым. Негізі, үнемі ыждағаттылық пен ұқыптылықты қажет ететін саланың қыр-сыры баршамызға мәлім ғой. Сол себепті де мұндағы мамандар өз тұтынушыларына бар өнерін салып, қызмет етеді. Ең бастысы, тұтынушы талғамынан шыға білу, – дейді сән салонының иесі Мереке Әділбайқызы.

Кәсіпкер қазір өзінен басқа 2 адамды жұмыспен қамтып отыр. Олар қыз-келіншектердің талғамына сай қызмет көрсетіп келеді. Мұндағы заманауи құрылғылар да арнайы тапсырыспен алыныпты. Мереке алдағы уақытта кәсіп көзін кеңейтіп, тұрғындардың сұранысын жан-жақты қанағаттандыратын тың жобаларды жүзеге асыруды көздеп отыр. Әрине, бұл әзірге уақыт еншісінде...

Жалпы, Мемлекет тарапынан кәсіпкерлерге жыл сайын қолдау көрсетіліп, соның нәтижесінде жергілікті халық кәсіптің сан-саласын игеруде. Бизнестің тетігін тауып, меңгерген әрбір жан өз мүмкіндігін толық пайдалануда. Демек, бұл сән салоны да сол қолдаудың жемісі.