РУХАНИ САНАНЫ ЖАҢҒЫРТАР КӨРМЕ
«№19 санаторлық бөбекжай-бақша» қызметкерлерінің арасында «Рухани жаңғыру – ел дамуының кепілі» атты байқау өтті.
Байқаудың ашылуында Елбасы Жолдауының басым бағыттарының бірі білім саласына арналған желкенді кеме саяхатқа шығарылып, театрландырылған көрініс қойылды. Байқау алдында «Ұлттық рухты ұлықтаған арулар» тобының ұйымдастырушысы Б.Іздібаева, «Асыл мұра» тобының ұйымдастырушысы С.Байтуғанова, «Сұңқар» тобының ұйымдастырушысы Л.Сүгірова, «Ұлы дала қырандары» тобының ұйымдастырушысы Б.Бақтыбаев әр топтың өзінің ұранымен таныстырып, өнерлерін ортаға салды.
Ал, байқаудың негізгі кезеңінде бөбекжай қызметкерлері өз идеяларымен жасаған қолөнер бұйымдарымен таныстырды. Көптің көзайымына айналған бұл көрмеге қазақтың салт-дәстүрі мен әдет ғұрыптарын суреттейтін ұлттық нақыштағы бұйымдар қойылған. Оның ішінде қазақтың киіз үйі, алтын адам, қазақы ою-өрнектермен әшекейленген ыдыстар, ұлттық киімдер де бар. Сонымен бірге, қолдан жасалған кілемше, жіппен тоқылған құмыра, хас шеберлердің қолынан шыққан домбыра, қобыз және тағы басқа да бұйымдар көрмеге қойылыпты. Әсіресе, мұндағы қызметкерлер жасап шыққан қабырға сағаты көпшіліктің қызығушылығын тудырды.
– Бөбекжай қызметкерлері арасында осындай байқаулар жиі ұйымдастырылып тұрады. Сол арқылы өздерінің шығармашылығы артып, жан-жақты ізденісі, идеялары жетіледі. Өздеріңіз көріп отырғандай осы байқауға қойылған бұйымдардың барлығын өзіміздің қызметкерлер, тәрбиешілер жасап шықты. Негізі Елбасының «Болашаққа бағдар: рухани жаңғыру» атты бағдарламалық мақаласында тарихтың өткеніне көз жүгіртіп: «Ұлттық жаңғыру дегеніміз – ұлттық санамен тығыз байланысты. Оның түпкі мақсаты – ұлттық бірегейлікті сақтап, ел ішінде бейбітшілік пен келісім үйлесе отырып, ұлттық береке, бірлік салтанат құрған бәсекеге қабілетті, табысты ел болу» деп анықтап айтқан болатын. Осы орайда біз де түрлі шараларды ұйымдастырып келеміз. Алдағы уақытта да осындай байқаулар ұйымдастырылатын болады, – дейді бөбекжай басшысы А.Кайранбаева.
Байқау соңында әділқазылар алқасының шешімімен «Асыл мұра» тобы бас жүлдені жеңіп алса, екінші орын «Сұңқар» тобына бұйырды. Ал, келесі орындарды «Ұлттық рухты ұлықтаған арулар» мен «Ұлы дала қырандары» тобы өзара бөлісті.
Н.АБСАТТАРОВА,
«№19 санаторлық бөбекжай-бақша» әдіскері.