Тәртіп тазалықтан басталады
Өткен жылы кент пен барлық ауылда құрамында сынап бар химиялық қалдықтарды жоюға арналған 70 контейнер жәшігі қойылды. Ондағы мақсат – қоғамдағы тазалықты сақтай отырып, құрамында зиянды заттар бар тұрмыстық қалдықтарды жою.
Жалпы, осы типтегі 40 контейнер кент орталығына қойылса, қалған 30-ы елді мекендерде тұр. Оған тұрмыстық қалдықтардан шыққан шағын люминесцентті шамдар, сынапты термометрлер, химиялық қуат көздерін беретін батареялар, шағын аккумуляторлар салынады. Мұндай тұрмыстық қалдықтар оқшауланбаса қоршаған ортаға қаншалықты зиян тигізетіні айтпаса да белгілі. Сондықтан, тұрғындар қоршаған ортаға тигізетін зиянды әрі химиялық қалдықтарды осындай жәшікке салуы тиіс.
Арнайы орнатылған бұл сары жәшіктің сыртында да не салу керектігі анық жазылған. Өкініштісі, кейбіреулер мұнда басқа қалдықтарды салып, сыртындағы ескертуді елемейтін көрінеді. Тіпті, осы сары жәшікке салынуы тиіс қалдықтарды жалпы қоқыс салатын орындарға тастайтындар да бар. Тазалықтың тәртіптен басталатынын ескерсек, әр затты өз орнына қойып үйренгеніміз жөн.
Н.АЛПЫСБАЙ.