«Тазалық – денсаулық кепілі». Осы сөзге жай күндері мән бермейтініміз рас. Бірақ, бүгінде көптеген қатерлі аурулардың көбейуіне экологиялық тепе-теңдіктің бұзылып, ауаның ластануы себеп болып отыр. Ал, бұған қазірде біздің еліміз ғана емес, әлем елдері алаңдаушылық білдіруде. Өйткені, табиғи апат емес, қоршаған ортаға адамзаттың қолымен жасалып отырған залал жер тұрғындарына қауіп төндіріп тұр. Соңғы жиырма жылда әлем халықтарының тұтынған тұрмыстық қалдықтары, соның ішінде полителлиннен жасалған құтылар мен қалталар жердің бетін де, астын да ластап жатыр. Тіпті бойындағы химиялық қоспалардың нәтижесінде ұзақ жылдар бойы шірімейтін бұл қалдықтар жердің демін бітеп, көгал алқаптарды қуратып, құм суырған тақырға айналдыра бастады. Оның зардабын қазірде тартып отырмыз. Енді адамзат мекені – жер шарын апаттан аман сақтап қалудың жалғыз ғана жолы – тазалық сақтау және сол тазалықты әр адам өз ауласынан бастауы тиіс.

Кеше аудан әкімі Қ.Сәрсенбаевтың қатысуымен кент тазалығына байланысты жиын өтті. Жиынға ауданның тазалығына жауапты мекеме басшылары мен көше комитетінің мүшелері қатысты. Аудан әкімі тазалық айлығы мен көктемгі сенбіліктің басталғанын, тазалық мәселесіне көп көңіл бөлу керектігін айтып, ардагерлер мен көше комитеті мүшелерінен тұрғындарды таза­­­­­лыққа шақыруын сұрады. Сенбілік бас­талғаннан бері барлық бөлім, мекеме қызметкерлері сенбілікке шығып, кент таза­лығына үлес қосып жатқанын, де­се де бұл жұмыстарды алдағы уақытта ширата түсуді тапсырды. Сондай-ақ, Қай­ратбек Әубәкірұлы сенбіліктерде бел­сенділік танытып жүрген Т.Жүргенов атындағы №123 мектеп-лицейі мен КРЭК мекемесін өзгелерге үлгі етті. Сонымен бірге жиын барысында көшелер мен көпқабатты үйлердің аулаларын қоқыс жәшіктерімен толықтай қамтамасыз ету, кент ішіне толық аяқсу келтіру үшін көше бойындағы көміліп қалған арықтарды қазып, көркейту-көгалдандыру жұмыс­тарына ден қою және көктеп бой алған көшеттерді егесіз жүрген малдардан қору үшін пада ұйымдастыру жұмыстарын қолға алу керектігі айтылды. Сондай-ақ, тиісті сала басшыларына көшелердегі арықтардың аяқсу көтерілмейтін жерлерін анықтап, трубаларын ауыстырып, көмілген жерлерін аршу үшін арнайы жұмыс тобын құрып, жүйелі жұмыс жасауға тапсырма берді.

Жиын барысында кент әкімінің міндетін атқарушы Н.Бәйімбет кент ішінде тазалыққа байланысты атқарылып жатқан жұмыстар жайында баяндама жасап, көше комитеті мүшелерінің тізімін таныстырды. Басқосуда тазалықтан өзге ауыр жүк көліктерінің салмағымен көше­лердің бүлініп жатқаны жайы да сөз болды. Бұл жөнінде Қайратбек Әубәкірұлы жауапты мекеме басшыларына орталық көшелермен ауыр жүк көліктеріне жүруге тыйым салынған жол белгілерін қойып, кешіктірмей мәселені шешуді тапсырды.

Жиын соңында аудандық ардагерлер кеңесінің төрағасы С.Әлиев кент тазалығы барлығымызға ортақ екенін айта келе, осындай жалпыхалықтық іске ел болып ұйысып, ауызбіршілік танытуға шақырды.