ЦИФРЛАНДЫРУ – ЖЕМҚОРЛЫҚТЫ ЖОЮ

Мемлекет басшысы биылғы халыққа Жолдауын «Төртінші өнеркәсіптік революция жағдайындағы дамудың жаңа мүмкіндіктері» деп атады. Бұл мақсатта ел ертеңіне бағытталған он түрлі маңызды міндетті алға тартты. Осы аталған басым міндеттердің бірі – жемқорлықпен күрес және заңның үстемдігі.  
Жолдауда айтылған деректерге жүгінсек, соңғы үш жылда жоғары лауазымды шенеуніктер мен мемлекеттік компаниялардың басшыларын қоса алғанда, 2,5 мыңнан астам адам сотталған. Осы уақыт ішінде олардың 17 млрд теңге көлемінде келтірген залалы өтеліп, мемлекет қорына қайтарылған. Бұдан байқағанымыздай, «көлеңкелі экономикадағы» келеңсіз әрекеттер әлі де азаяр емес. Сондықтан бүгінгі уақыт талабына сай мемлекеттік органдардағы процестерді, оның ішінде олардың халықпен, бизнеспен қарым-қатынасын цифрландыру кезек күттірмейтін маңызды мәселенің бірі болып отыр.
Өңірлік коммуникациялар қызметінде Қазақстан Республикасы Мемлекеттік қызмет істері және сыбайлас жемқорлыққа қарсы іс-қимыл агенттігінің Қызылорда облысы бойынша департаментінің бас маманы  Мұратбек Искаков облыстық ішкі саясат басқармасының қызметшілерімен, жалпы басқармаға қарасты серіктестіктер мен қоғамдық ұйымдар басшыларымен, БАҚ өкілдерімен кездесіп, жемқорлықпен күрес жолындағы жаңа міндеттер жайында түсіндірмелік жұмыстарға мән берді.
Жиынға қатысқан облыстық ішкі саясат басқармасының басшысы Айдын Қайруллаев Елбасы Жолдауында нақтыланған 10 міндетті атап өтіп, оның ішінде жемқорлықпен күрес, сот және құқық қорғау жүйелері, қоғамдық тәртіпті сақтау және қауіпсіздікті қамтамасыз ету жайын қарастырған 9-шы міндет төңірегінде тереңірек тоқталды.
– Сыбайлас жемқорлықтың бір көрінісі – заңды білмеу салдарынан туындаса, екінші көрінісі заң­сыз жолмен қосымша табыс табу әрекетінен туындап жатады. Сондықтан, заңды білмеу жазадан құтқармайтынын жадымызда ұстап, ресми құжаттарды рәсімдеуде, әсіресе, мемлекеттік сатып алу қызметінде аса мұқият болу қажет, – деді Айдын Бөкенбайұлы.

Ғазиза ӘБІЛДА,
«Сыр бойы».