Жалағаш ауданында жыл басынан жұмыс жасап тұрған шағын және орта кәсіпкерлік субъектілерінің үлесі 83,2 пайыздан 89,1 пайызға артқан. Өз бизнесін дамытып, мемлекеттік бағдарлама шеңберінде несие алған кәсіпкерлер қатарында Еркебұлан Көптілеуов те бар. Ол «Аладдин» атты кілем жуатын цех ашқан.
Тапсырыспен келген кілемдерді цех қызметкерлері түрік құралдарымен жуады. Кәсіп иесі кілем жууға сұраныстың көп екенін айтады.
Ауданда кәсіп ашқан Мейірбек Әміров «СержанГазСтрой» ЖШС-ін құрып, металл өндейтін цех жұмысын бастаған. Онда кәсіпкер жекеленген токарлық және фрезерлік жұмыстар – гофрлеу, бұрау ісін атқарады. Темір бұйымдары және тұрмысқа қажетті заттарды дайындау цехын іске асыру үшін 10 миллион теңге несие алған. Сондай-ақ, кәсіпкер «Бизнестің жол картасы – 2020» бағдарламасы бойынша 1,5 миллион теңге грант ұтып алған.