Болашақта ел тұтқасын ұстар бүгінгі буынның рухани сусындап, өмір сүру дағдысының кеңеюіне ауданда қандай жағдай жасалған? Аудан жастары немен айналысады? Осы мәселелер төңірегінде жасалып жатқан жұмыстарды көзбен көріп, өңір жастарымен еркін сұхбат құру мақсатында Сыр еліне сапары аясында ҚР Ақпарат және қоғамдық даму вице-министрі Данияр Есин жалағашқа атбасын бұрды.

Вице-министр жастар орталығының жұмы­сымен танысып, жастармен еркін әңгімелесті. Олардың әрбір идеясы мен ұсынысын тыңдады. Орталықтың ди­рек­торы Ерхан Бақбергенұлы жастар жы­лында атқарылған шараларға, жастар үшін жұмыс жасайтын арнайы орындардың жұмысына тоқталды. «Жалпы аудан халқының 24 пайызын жастар құрайды. Жастар орталығының тұрақты түрде жүргізіп отыратын жұмыстары бар. Солардың бірі – ауылдағы, кенттегі жас­тардың басын қосып, олармен түрлі тақырыпта жиындар мен кездесулер өткізу. Біз осылайша біраз жастың бета­лысын түзеп, оларға бағыт көрсетуге тырысамыз. Бүгінгі күні аудан бойынша тұрақты түрде жұмыс жасайтын спорт бөлімі, «Жайдарман» және еріктілер клубы бар. Саламатты өмір салтын ұста­натын жастар спорт бөліміне барып, үйірмелерге қатысады. Сонымен бірге жастардың бос уақытын тиімді пайдалану мақсатында "COWORKING" орталығы ашыл­ды», – деді аудан жастарының көш­басшысы.

Мұнан бөлек вице-министр Жастар жылы аясында жасалған жұмыстарды сарап­тап, келер Еріктілер жылында жас­тардың белсенділігі жоғары болу керектігін атап өтті.