Анаңды Меккеге үш рет арқалап апарсаң да перзенттік парызыңды өтей алмайсың. Бұл сөздің астарында «ана» деген асыл аттың құдіреті жатқандай. Тоғыз ай құрсағында көтеріп, жарық дүниеге әкелген, түн ұйқысын төрт бөліп, ақ сүтін берген, қанаттыға қақтырмай, тұмсықтыға шоқтырмай өсірген ардақты аналарды тіршіліктің тірегі деуге болады. Мынау тынымсыз тіршілік пен кең дүниенің өзі де тек аналармен ажарлы емес пе?!

Аптаның бейсенбісінде Ш.Ермағанбетова­ атын­дағы №246 орта мек­тепте «Әйел барда, әлем бар» атты IV аудандық әйелдер форумы өтті. Жиын­ды аудан әкімінің орынбасары Жағыпар Тажмаханов ашып, қоғамда әйел-аналардың орны ерекше екенін атап өтті.

– Қа­зақ қоғамының қиын кезеңдерінде әйелдер қауы­мының ел үшін сіңірген еңбегі зор. Тарихтан белгілі батыр қыз-келіншектердің ерлігінің өзі көпке үлгі-өнеге. Ауданда өмірге ұрпақ әкеліп, оларды тәрбиелеп өсіруде үлгі-өнеге болып жүрген «алтын құрсақты» аналар да жеткілікті. Бүгінде мыңнан аса көпбалалы ана есепте тұрады. Олардың әрқайсысы қоғамға пайдалы, саналы ұрпақ тәрбиелеуде аянбай тер төгіп келеді. Даналық пен ізгіліктің, әдемілік пен мейірімділіктің үлгісі саналатын, аяулы жар, ардақты ана, ақжаулықты әжелер мен қырмызы қыздардың басын қосқан бұл форум ауданымызда төртінші рет ұйымдастырылып отыр. Баршаңызды осы мерекемен шын жүректен құттықтаймын, – деді аудан әкімінің орынбасары.

Мұнан кейін мінберден орын алған облыстық «Ару ана» қоғамдық бірлестігінің төрайымы, Қызылорда қалалық кеңес мүшесі Раушан Сарымсақова «Қазақ қоғамындағы әйел-ананың орны мен рөлі» тақырыбында баяндама жасады.

– Тарихтан белгілі жайттардың барлығы қазақ халқының өмірінде әйел орнының ерек­ше болғандығын байқатады. Қазіргі қазақ әйелі – қоғам мен мемлекет көркі. Әйелдер елімізде болып жатқан барлық қоғамдық-саяси өзге­ріс­терге, халықаралық-дипломатиялық жұ­мыс­­тар­ға, қоғамның бүкіл тыныс-тіршілігіне бел­сене ара­ласып отыр. Олар бар күш-жігерлерін жұм­сап, ерлермен бірге әр салада еңбек етіп, ел бола­шағының жарқын болуы жолында тер төгіп жүр. Сондай-ақ әйелдер қауымы шағын және орта кәсіпкерліктің дамуына, әлеуметтік-экономикалық жағдайының көтерілуіне өз үлестерін қосып келеді, – деді қалалық кеңес мүшесі Р.Сарымсақова.

Форум барысында Нұр-Сұлтан қаласында өткен ІІ республикалық, ауыл әйелдері фору­мының делегаты, «Жалағаш – достық мекені» қоғамдық бірлестігінің төрайымы Дина Мирманқызы отбасының, елдің берекесі мен баянды бірлігін, тату-тәтті тірлігін, жарасты ынты­мағын сақтаушы да – әйел. Әйел – ана, әйел – өмір, әйел – тіршілік өзегі. Өмір бесігінде сәби тербетіп, адамзат баласына ұрпақ сыйлар ұлы құдірет иесі екенін тілге тиек етсе, М.Шәменов ауылы мәдениет үйінің ұйымдастырушысы Алмаш Жүнісқұлова форумның маңызды шаралардың бірі екенін жеткізді.

Бұдан бөлек «Fulcrum Foundation» азаматтық бастамаларды қолдау қоғамдық қорының президенті Ақгүл Асанбаева батыр аналар мен ауданның әлеу­меттік-экономикалық дамуына үлес қос­қан, көп жыл түрлі салада абыройлы қызмет ат­қар­ған әйелдер қауымын арнайы ди­п­ломмен марапаттап, бағалы сыйлықтарын тап­сырды.

Форум соңы аудандық жастар ресурстық орта­лығының қызметкерлері Нұржан Амандық, Нарбота Серәлі дайындаған әзілге толы ойындар мен өнер­паздардың концерттік бағдарламасына ұласты.