ЖАЛАҒАШТА ОҚУШЫЛАР ҮЙІ МЕН ӨНЕР МЕКТЕБІ ПАЙДАЛАНУҒА БЕРІЛЕДІ

Биыл Жалағаш кентінде 200 орындық оқушылар үйі мен 50 орындық өнер мектебі пайдалануға беріледі. Бұл туралы Жалағаш ауданының әкімі Асылбек Шаменов Өңірлік коммуникациялар қызметінің ақпарат алаңында өткен баспасөз конференциясында мәлімдеді.

Айта кетейік, өткен жылы М.Шәменов ауылында апаттық жағдайдағы орта мектеп жаңадан салынып, пайдалануға берілді. Аққыр және Мақпалкөл ауылдарындағы орта мектеп ғимараттарына күрделі жөндеу жұмыстары жүргізілді.

– Биыл Таң ауылындағы орта мектеп ғимаратына 333 млн. теңгеге күрделі жөндеу жұмыстарын жүргіземіз. Ал Аламесек ауылындағы мектепті жөндеуге жоба-сметалық құжат әзірлеп, қаржыландыруға ұсыныдық. Жалағаш кентіндегі 300 орындық №123 мектеп-лицейдегі оқушылар саны 700-ден асуына байланысты қосымша 200 оқушыға арналған ғимарат салу үшін 11,2 млн. теңгеге жоба-сметалық құжаттары дайындалуда, – деді аудан әкімі Асылбек Шаменов.

Айта кетейік, аудан мектептерінің 75 пайызы жаңа модификациялық кабинеттермен жабдықталған.