АҒЫМДАҒЫ ЖЫЛЫ 10 КӨШЕГЕ ЖӨНДЕУ ЖҰМЫСТАРЫ ЖҮРГІЗІЛЕТІН БОЛАДЫ

Автомобиль жолдарының жұмыс істеуін қамтамасыз ету мақсатында осы жылы біршама жүйелі жұмыстар жүзеге асады деп жоспарлануда.

Аудан бойынша жалпы ұзындығы 206,5 шақырымды құрайтын 202 көшелердің 66,8 шақырымы қанағаттанарлықсыз жағдайда. Осыған орай, аудандық маңызы бар Еңбек ауылы бағытындағы автомобиль жолының 8 шақырымын орташа жөндеу жұмыстарына жоба-сметалық құжаттар әзірленіп, 2018 жылға облыстық бюджетке 191,4 млн теңгеге сұраныс берілді. Бұл жобаның қаржысы бюджетті нақтылау барысында жоспарланатын болады. Сонымен қатар, Мәдениет – Жүргенов – Жаңаталап - Аққыр бағытындағы автомобиль жолының 9,4 шақырымын күрделі жөндеу жұмыстарына жобалау-сметалық құжаттар әзірлеу жоспарланып отыр.
Ал, апаттық жағдайдағы аудандық маңызы бар «Самара-Шымкент-Мәдениет-Мақпалкөл-Жаңаталап-Аққыр» автомобиль жолының бойындағы «Оңтүстік коллектор» көпірін қайта жаңғырту жұмыстарына  288,1 млн теңгеге жобалау-сметалық құжаттама әзірленіп, қазіргі таңда мемлекеттік сараптамадан өткізу жұмыстары жүргізілуде.

Бұдан бөлек, 2017 жылы облыстық бюджеттен бөлінген 155,1 млн. теңгеге Жалағаш кентіндегі Төле би көшесін күрделі, 71,2 млн. теңгеге А.Ізтілеуова көшесін орташа жөндеу жұмыстары жүргізіліп, пайдалануға берілді. Жергілікті бюджеттен қаралған 33,3 млн. теңгеге  Жалағаш кентіндегі жалпы ұзындығы 4,6 шақырым құрайтын 4 көшеге ағымдағы жөндеу жұмыстары жүргізілді. Олар І.Қабылов (1,1 шқ), С.Қалыбаев (1,1 шқ), И.Панфилов (1,2 шқ), Ы.Алтынсарин (1,2) көшелері.   
Биылғы жылы бірінші кезекте аудан орталығындағы көшелерді жөндеу қолға алынады. Осыған орай, Жалағаш кентіндегі 10 көшеге (Қабылов, Қалыбаев, Нысанбай жырау, Мырзалиев, Жүргенов, Әйтеке би, Бұқарбай батыр, Отарбаев, Алтынсарин, Алтынсарин тұйығы көшелері) орташа жөндеу жұмыстарын жүргізуге жалпы құны 463,0 млн теңге құрайтын жобалау-сметалық құжаттар әзірленіп, облыстық бюджеттен қаржыландыруға ұсынылды. Одан басқа Жалағаш кентіндегі 4 көшеге (Әйтеке би, Бұқарбай батыр, Абай, Сәрке батыр көшелері) орташа жөндеу жұмыстарын жүргізуге жобалау-сметалық құжаттар әзірленеді. Бұл жұмыстардың барлығы халық игілігі үшін жасалады. Алдағы уақытта жүйелі жұмыстың оң нәтижесін көреміз деп сенеміз.