Бассейн құрылысы бітуге жақын
Биыл жалағаштықтар үшін айтулы жыл деуге болады. Себебі жыл басынан бері ел қуанышын еселеген жақсы жаңалықтар, игі істер орын алуда. Биылғы жылдың еншісіндегі ең маңызды іс жаңа мешіттің игілікке берілгені болды. Көптің игілігі үшін қолға алынған бастамалардың қатарында жүзу бассейнінің құрылысы да бар. Қазіргі таңда аудан халқы көптен күткен бассейн құрылысы да аяқталуға жақын.Құрылыс басына барып-қайтқан біз бассейн ғимаратының құрылысымен таныстық. Заманауи үлгіде салынған нысан барлық жағынан да үйлесім тауып тұр, алыстан көз тартады. Пайдалануға берілсе, кент келбетін арттырып, көркін асырар ғимараттардың бірі болмақ. Құрылыс алаңының басшысы Бақытбек Ахметовпен сөйлескенімізде жаңа нысанның бір айдың көлемінде пайдалануға берілетінін жеткізді.
– Былтыр қыркүйек-қазан айларында басталған құрылыс жұмыстары келер айдың соңына жақын аяқталып қалады деп күтілуде. Жоспарлаған уақытта жұмыстарды аяқтап, ел игілігіне берсек деп отырмыз. Бүгінгі таңда бассейн құрылысының сексен-тоқсан пайыз жұмысы бітіп тұр. Жұмысшылардың қатарында жергілікті халықтың үлесі де бар. Жалпы 50-60 адам жұмыс жасап жатса, оның ішінде 10-ға жуық жұмысшы жергілікті жерден тартылған. Ғимаратта үлкен, кіші бассейн, жаттығу залы, дәрігерлік кабинет, дүкен, киім ауыстыру бөлмесі және душ қабылдайтын орын қарастырылған. Жұмысты барынша сапалы, әрі қарқынды жүргізуге тырысудамыз. Өйткені елдің игілігі үшін істелетін жұмыстың ең бірінші сапасы сын көтеруі керек. Осыған мән беру аса маңызды. Мұндағы құрыш қолды құрылысшылардың барлығы өз жұмыстарына ұқыпты, жауапкершілікті сезіне біледі. Ең бастысы жалағаштықтардың демалуына, әсіресе жастардың бос уақытын тиімді пайдаланып, жаттығу, жүзу залына келуіне мүмкіндік болмақ, – дейді құрылыс алаңының басшысы.
Бақытбек Ахметовпен азын-аулақ әңгімелескенімізде осындай маңызды, нақты ақпаратты білдік. Қызу жұмыс үстіндегі бригада мүшелеріне кедергі келтірмес үшін маманмен бірге бассейннің басқа да бөлмелерін аралап шықтық. Расымен нысанның есік-терезелеріне дейін салынып, ішкі жұмыстары жүргізіліп жатыр. Бассейннің тереңдігі 1,60-2 метрді құрайды. Дәуімбай елді мекенінде орналасқан құны үш жүз миллионнан асатын жүзу бассейнін кәсіпкер Қайыржан Құлтекенов өз қаржысына салуда. Мердігер компания «ИнтегерГосторл» ЖШС құрылыс жұмыстарының қарқынды жүруіне басымдық беріп отыр.
Құрылыс алаңының басшысы айтқандай, бұл нысанның жастарға берері көп-ақ. Салауатты өмір салтын ұстанатындарға таптырмас орын, жаңа мүмкіндік болмақ. Кез келген жастағы адамға арналған жүзу бассейндері, жаттығу залы іске қосылса, аудан халқының ішінде спортқа әуестенетіндердің қатары артарына сенеміз. Талапқа сай ғимараттың ішінде барлық жағдай жасалуда. Өз қаражатын елдің пайдасына, әсіресе жас буынның дұрыс бағытта қалыптасуына жол ашатын, бос уақыттарын тиімді ұйымдастыруға мүмкіндік сыйлайтын жүзу бассейні мен жаттығу залына жұмсап жатқан азаматтың бұл ісі аудан халқының қуанышын еселемек. Бассейн ғимаратымен танысқан кезде құрылыс саласынан аса қатты хабарымыз болмаса да, нысанның заманауи үлгіде және өте тиімді бөлімдерден тұратынын байқадық.
Айта кету керек, өткен жыл ауданымыз үшін жаңа табыстар, оң өзгерістермен есте қалды. Жалағаш ауданы көптеген салалар бойынша облысымыздың көшбасшысы атанды. Шағын және орта бизнестің дамуы, жұмыссыздықты төмендету, өңірдің дамуы бойынша да жақсы нәтижелерге қол жеткіздік. Жаңару мен тың серпінді жобаларды іске асыру жолында әлі де болса атқарылар жұмыс көп, мақсат-міндеттер де ауқымды.
Нұржамила АЛМАСҚЫЗЫ
