Аймақ басшысы Таң ауылындағы бірқатар әлеуметтік нысандарды аралады

Ауданға жұмыс сапары барысында аймақ басшысы "Агро Лидер Таң" ЖШС-ның ет өңдеу цехының жұмысымен танысты.
150 миллион теңгені құрайтын жобаның құрылысы 2018 жылы басталып 2019 жылы мамырда аяқталған. Бүгінде қуаттылығы - күніне 5 мүйізді ірі қара сойылатын цехтың аумағы 950 шаршы метрді құрайды. Цех ет өнімдерін шығарады.

Серіктестік директоры Сәкен Шағыртаев облыс басшысына цех жұмысын таныстырып, цехта дайындалатын өнімдерді көрсетті.

Аймақ басшысы стенд арқылы ауылдың әлеуметтік-экономикалық дамуы және ауылдық округте "Ауыл-Ел бесігі" бағдарламасы аясында жүргізіліп жатқан жобалармен танысты.

- Биыл "Ауыл - ел бесігі" жобасы аясында Таң ауылындағы 14 көшеге орташа жөндеу жұмыстары, сонымен қатар №118 орта мектеп ғимаратын күрделі жөндеу, Таң елді мекеніндегі дәрігерлік амбулатория құрылысына бюджеттен қаржы бөлінді, - деді ауыл әкімі Қайрат Сейдахметов.

Облыс әкімі Гүлшара Әбдіқалықова Таң ауылындағы "Ауыл-ел бесігі" жобасы аясында күрделі жөндеуден өткен №118 орта мектептің жұмысымен де танысты. Аудандық білім бөлімінің басшысы Талғат Садықов стенд арқылы мектептің күрделі жөндеу жұмыстарымен және жаңа оқу жылына дайындық барысымен таныстырды.
- Ауданда білім беру ұйымдарының жаңа оқу жылына дайындық жұмыстары жоспарға сәйкес ұйымдастырылуда.
Аудан бойынша 20 мектеп, 1 кешкі мектеп, 36 мектепке дейінгі ұйымдар, 3 қосымша білім беру ұйымдары жұмыс жасайды.

2021-2022 оқу жылында 20 мектепте 7175 оқушы оқиды деп күтілуде. Оның ішінде 1-сыныпқа барлығы 716 оқушы қабылданды. Жаңа оқу жылынан бастап 1 сыныптарға негізделген «Әліппе» мен «Ана тілі» пәні енгізіледі.1-3 сыныптарда қыркүйек айынан бастап «Информатика» пәні оқытылады. Денешынықтыру пәнінің мазмұны жаңарып, шахмат, стол теннисі, тоғызқұмалақ сабақтары кіріктіріледі. Жаңа оқу жылына оқулықтар мен оқу-әдістемелік кешендерін сатып алуға барлығы облыстық бюджеттен 23068 дана оқулықтарды сатып алуға 53 млн 149 мың қаржы бөлінді. Қазіргі таңда оқулықтар толық алынып, мектептерге таратылды, - деді аудандық білім бөлімінің басшысы Талғат Садықов.

Аймақ басшысы оқу кабинеттерімен танысып, аудан әкіміне жаңа оқу жылында санитарлық талаптардың қатаң бақылануын тапсырды.