Қаржыгерлер құрмет төрінде

Кеше аудан әкімдігінде қаржыгерлер бас қосты. олардың кәсіби мерекесі мен ұлттық валюта күні қарсаңында сала қызметкерлерін қабылдаған аудан әкімінің орынбасары Пакуатдин Шамұратов қаржыгерлердің қажырлы еңбегіне тоқталып, аймақтағы экономика және қаржы саласының қызметкерлерін «ҚР Ұлттық валютасы – теңге күнімен» тұспа-тұс келетін кәсіби мерекесімен құттықтады.

– Мемлекеттік маңызды істердің алға басуына қаржыгерлердің қосатын үлесі зор. Тәуелсіздік алғалы бері бұл саланың да ай­тарлықтай дамығанын білеміз. 1993 жылы 15 қарашада Қазақстан Республикасының өз ва­лютасы, теңге айналымға енді. Бұл эконо­ми­касы құлдырап, өндірістер жабылудың аз-ақ алдында тұрған мемлекетіміздің еге­мендік алғаннан бергі алғашқы жасаған да­­­­му­­дың баспалдағы болды. Тұңғыш Прези­­­дентіміз Н.Назарбаевтың сындарлы сая­­­­са­­тының арқасында еліміз көптеген сын­нан сүрінбей өтті, жас ел ретінде өзінің ше­ка­­расын бекітіп, саяси қадамдарын жасай бас­тады. Төл теңгеміз тәуелсіздіктің айшықты символдарының біріне айналды. Халықтың көңіліне сенім ұялатып, болашаққа нық қадам басуына жол ашты.

Тәуелсіздік алғаннан бергі отыз жыл ішінде елімізде заманауи экономика қалыптасты. Қазақстан әлемдік қауымдастықта маңызды әріптеске айналды, соның арқасында елімізге аса үлкен көлемде инвестициялар тартылды. Жалағаш ауданында экономикалық өсімді қамтамасыз етуде және әлеуметтік проб­лемаларды шешуге бағытталған жұ­мыс­тар үздіксіз жүргізіліп, нәтижесінде эконо­микада тұрақты өсім қалыптасты. Даму көрсеткіштері де біршама артты.

Ұлттық валютамыз айналымға енгеннен бастап Сыр өңірінде де қалыптасып, өсіп-өркендеді. Ел экономикасының дамуына аян­бай күш-жігерін жұмсап, жауапкершілік жүгін арқалап, адалдықпен еңбек еткен қар­жы саласының ардагерлері мен сала маман­дарына алғысымды білдіремін, – деді ол.

Мұнан кейін П.Шамұратов ұлттық ва­люта күніне орай сала қызметкерлеріне об­лыс әкімі орынбасарының, аудан әкімінің және «Nur Otan» партиясы аудандық филиалы төр­ағасының алғыс хаттарын табыс етті. Со­нымен қатар салтанатты жиында аудандық мәслихат хатшысы Гүлзат Ердәулетқызы және «Nur Otan» партиясы аудандық филиалы төрағасының бірінші орынбасары Қаншагүл Шоңмұрынқызы аудан қаржыгерлерін мереке­лерімен құттықтап, елеулі еңбектеріне шолу жасады.

Жалпы тәуелсіздік жемісінің бірі осы ұлттық валютамыздың айналымға енгені болса, бүгінде осы саланың бір ізге түсіп, жүйелі жұмыстың нәтижесінде ел экономикасының жоғарылауына септігін тигізді. Тәуелсіз мем­ле­кет экономикасының темірқазығы төл валютасы екені түсінікті. Тағдырлы кезеңде қабылданған шешімнің мән-маңызын тере­ңірек түсіну қиын емес. Әсіресе ұлттық валютаны айналымға енгізу Ел Тәуелсіздігінің қалыптасуына, дербес қаржы-несиелік саясат жүргізуге, нарықтық қатынастарға бетбұрыс жасап, әлеуметтік-экономикалық дамуға зор үлесін қосты. Сондай-ақ аудандық бюджеттің салықтық түсімдері де жылдан-жылға ұл­ғайып келеді. Салықтық түсімдер көлемінің ұлғайғаны аудандық бюджет кірісінің көлемінің өсуіне ықпал жасауда. Ал өңір тайқазанының молаюы дамуға бағытталатын игі істер мен ауқымды жобалардың қолға алынуына және әлеуметтің әлеуетінің көтерілуіне де оң ықпалын тигізеді.

Нұр НАУАН