» » » Мәдениет министрлігі Роза Рымбаеваның өзін бірқатар концертке қатыстырмағаны туралы ренішіне жауап берді

Мәдениет министрлігі Роза Рымбаеваның өзін бірқатар концертке қатыстырмағаны туралы ренішіне жауап берді


ҚР Мәдениет және спорт министрлігі қазақ эстрадасының жарқын жұлдызы Роза Рымбаеваның өзін министрліктің концертіне қатыстырмайтыны туралы айтқанына қатысты пікір білдіріп, аталған ақпаратты жоққа шығарды, деп хабарлайды министрліктің баспасөз қызметіне сілтеме жасап Stan.kz.

Мәдениет министрлігінің мәліметінше, кеңес одағының және қазақ эстрадасының әншісі, профессор, Қазақстанның халық әртісі Роза Рымбаева ҚР Мәдениет және спорт министрлігі ұйымдастырған шараларға бірнеше рет қатысқан. Биылғы жылы өтетін бірқатар шаралар да Рымбаеваның қатысуымен жоспарланған.
«Роза Рымбаева «Еуразия» кеңесінің ашылуына орай ұйымдастырылған гала-концертте РФ еңбек сіңірген әртісі Иосиф Кабзонмен бірге ән шырқады. Сонымен қатар әнші Қазақстанның тәуелсіздігінің 25 жылдығына орай ұйымдастырылған концертте Қазақстанның халық әртісі Әлібек Дінішевпен, мемлекеттің еңбек сіңірген қайраткері Бекболат Тілеуханмен бірге өнер көрсетті», – дейді ведомстводағылар.
Сонымен қатар ведомстводағылар әйгілі әншінің 2018 жылы «Қазақконцерт» мемлекеттік концерт ұйымы ұйымдастырған Қазақстан облыстары бойынша гастрольдік концерттерге қатысқанын айтты.
«Сондай-ақ, Роза Рымбаева 15-16 маусымда Voice of Astana байқауы өткен күндері Батырхан Шүкеновті еске алуға арналған кешке қатысты. Ал 21 маусымда әнші Төлеген Мұхамеджановтың шығармашылық кешінде өнер көрсетті», – делінеді хабарламада.
Қазіргі уақытта Роза Рымбаеваның Қазақстан тәуелсіздігінің 26 жылдығына және Конституция күніне орай ұйымдастырылатын гала-концертке қатысатыны жоспарланған.
«Қазақстанның Мәдениет және спорт министрі Арыстанбек Мұхамедиұлының Роза Рымбаеваға деген сыйластығы ерекше әрі оның орындауындағы көптеген әндері сүйіп тыңдайды. ҚР Мәдениет және спорт министрі қазақ өнерән әлемге танытқан Роза Қуанышқызына шығармашылық табыс тілеп, алдағы уақытта да әншінің сахнадағы өнеріне тәнті болмақ», – дейді ведомстводағылар.
Естеріңізге сала кетсек, қазақ эстрадасының аңызына айналған Роза Рымбаева өзін бірнеше жылдан бері Астанадағы концерттерге шақырмай жүргенін айтқан еді.




http://stan.kz
03 шілде 2018 ж. 955 0