«Qazaqstan» Ұлттық телеарнасында «Жүрсіннің жүй­ріктері» жобасының ақтық мәресі өтті. Осыған дейін айтыскер ақындар арнайы тақырып бойынша шаппа-шап айтыстың көркін қыздырып, өздерін пародиялық қырынан да көрсете білген еді. Ал, ақтық мәреде олар еркін тақырыпта сөз сайысына түсті. Яғни, жекпе-жекте өздерінің қалаған тақырыбы бойынша айтысуға мүмкіндік берілді. Бұл кезеңде шығыстан шыққан шайыр Рүстем Қайыртайұлы мен шиелілік Ержан Әміров 2-ші және 3-ші орын үшін өзара мықтыны анықтады. Ал дүлділдер сайысындағы «Алтын домбыраның» екі мәрте жеңімпазы, жерлесіміз Мұхтар Ниязов пен қарағандылық шайыр Дидар Қамиев бас жүлде үшін сөз додасына түсті.

Ұлттық арнада өтіп жатқан жоба аясында бас жүлде ауда­нымыздың тумасы Мұхтар Ниязовқа бұйырды. Ал, қарсыласы келесі орынды қанағат тұтса, қазылар алқасының шешімімен екінші орынға Рүстем Қайыртайұлы лайық деп танылды. Сөз додасында тағы бір қызылордалық Ержан Әміров үздік үштікті түйіндеді.

Айта кетейік, «Жүрсіннің жүйріктері» – ежелден қалыптасқан айтыс өнерін шоу қойылымдар арқылы жаңа биікке көтеріп, ел ішінде, жастар арасында айтыскер ақындардың беделін қалыптастыратын мега-жоба. Телевизиялық айтысқа 20 ақын қатысқан болатын. От ауыз, орақ тілді кіл жүйріктердің ішінен оза шапқан жеңімпаздарға арнайы дипломдар мен қаржылай сыйлықтар табыс етілді.