Елбасының қазақ тілі әліпбиін латын қарпіне көшіру туралы бастамасы заман талабынан туындаған қажеттілік. Өйткені ақпараттық технологияның қарыштап дамыған уақытында өркениетті елдердің қолданысындағы латын графикасының үстемдігін жақсы білеміз.Әлем елдерінің 80 пайызы осы графиканы қолданады екен. Сонымен бірге компьютерлік құрыл­ғы­лар­дың тиімділігін арттырып, оның барлық мүм­кіндігін пайдалануда латын таңбасының көп әсері бар. Сондай-ақ ақпарат кеңістігіне еркін бойлап, заманауи технологияларды еш кедергісіз қолдануға жол ашады. Демек жаңа әліпби басқа елдермен саяси байланыста, мемлекеттің даму жүйе­сінде дамыған елдердің іс-тәжірибелерін тұтынуда алаңдатарлық қиындық туғызбайды. Керісінше, өз кезегінде қоғам дамуының ауқымын кеңейтеді.
Міне, бүгін бұл бастаманы қолға алып, іске көшетін сәт туып отыр. Қазақ елінің саяси-экономикалық, әлеуметтік-мәдени, ғылыми-ағартушылық дамуын, халықаралық кеңіс­тіктегі орнын, ішкі және сыртқы жағдайды жан-жақты ес­керген Тұңғыш Президент қазақ зиялыларының алдына үл­кен міндет қойды. Әліпбиді ауыстыруға ұзақ уақыт, қомақты қаражат, сонымен қатар интеллектуалдық күш-жігер керек.