Жұма күні облыста ІІІ халықаралық интернет-форумы өтті. «Цифрландыру: аймақтардың дамуы үшін жаңа мүмкіндіктер» атты интернет-форумға Ресей, Татарстан, Беларусь, Украина және Қытай сарапшылары мен «Huawei», «Dell», «Сколково» секілді цифрландыру саласының әлемдік жетекші компанияларының өкілдері қатысты. Форумда алғаш сөз алған аймақ басшысы Қырымбек Көшербаев қазіргі таңда ақпараттық-сандық технологиялардың маңыздылығына тоқталды.

– Баршаңызға белгілі, адамзат төртінші өнеркәсіптік революцияның табалдырығында тұр. Біздің уақыт өтпелі кезең болып саналады. Соған қарамастан төртінші революция қазірдің өзінде өз әмірін жүргізуде. Онлайн мен оффлайн арасындағы шекара ажырап, киберфизика жүйесінің уақыты келді. Осының барлығы бұл жүйедегі салалар құрылымына және мемлекеттің рөліне өзгеріс енгізуде.
Бүгінгі таңда цифрландыру кәсіпорындар, елдер арасындағы тұтастай алғанда бәсекелестікті арттыру, сондай-ақ, халықтың тұрмыс жағдайын жақсарту үшін қажет болып отыр. Осы жылдың мамыр айында өткен Астананың Global Challenges самитінде Мемлекет басшысы ғалам дамуының басты бес мегатрендтерін, оның ішінде адамзаттың өмір сүру салаларындағы цифрландырудың барлық буындарын, ауқымды еңбек нарығындағы өзгерістерді, урбанизациялауды трансформациялаудың сипаттарын атап көрсетті.
Тәуелсіздік жылдары ішінде біз әлемдегі бәсекеге қабілетті 50 елдің қатарына ендік. Бүгінгі міндет 30 елдің қатарында болу, ал, ол Қазақстаннан инновациялық дамудың және технологиялық жедел жаңғырудың жаңашылдығын талап етеді. Біздің еліміз экономиканың негізгі салаларына (9 сала) инновациялық өзгеріс жасауға басымдық берді. Әсіресе, негізгі тірек – энергетика мен шикізатқа, агроөнеркәсіп кешеніне, өнеркәсіп, логистика және ақпараттық технологияға жасалды. Қазақстан экономикасы цифрландыру деңгейі бойынша 85 мемлекеттің арасындағы рейтингте 50-орында және цифрлы экономиканың бастаушы тобына кіреді.
Сарапшылардың бағалауы бойынша, цифрландыру нәтижесінде Қазақстан экономикасы 30 пайызға ұлғайып, қаржыға шаққанда 2 трлн теңгені құрайтын болады. Әлемдік және отандық трендтерді ескере отырып Қызылорда облысы цифрландыру бойынша алғашқы қадамдарын жасауда.
Өткен жылы желтоқсанда біз жас ІТ-мамандарының «HackDay-2017» алғашқы аймақтық фестивалін өткіздік, аймақтық ІТ-саябақ ашылды. Халықаралық тәжірибені оқып-үйрену үшін облыс делегациясы Татарстан Республикасы мен Қытай Халық Республикасының «SmartCity» үздік орындарында болды.
«ҚазГерМұнай» мұнай компаниясы облыс аумағында «ақылды кеніш» технологиясын енгізді және Қызылорда облысындағы атом өнеркәсібінің кен өндіру кәсіпорындары сандық технологияны қолдану бойынша жұмыстарды бастады, – деді облыс әкімі Қ.Елеуұлы.
Сонымен қатар, форум барысында Татарстан Рес­пуб­ликасының Премьер-министрінің орынбасары-Ақпарат­тандыру және байланыс министрі Роман Шайхутдинов электрондық үкімет пен цифрлық экономика саласындағы жүзеге асырылып жатқан жобалар туралы айтты. Оның айтуынша, бүгінде Татарстанда IТ-саласындағы 1700 компания мен 32 мыңға жуық адам жұмыс жасайды. Ал, «Сколково» Мәскеу басқару мектебінің жетекші талдаушысы Илья Романовский «Цифрлық трансформация: ортаны цифрландырудан ақылды қалаға дейін» тақырыбында баяндама жасап, жақын арада 2011 жылдан бастап пайда болған «заттар Интернеті» ұғымының орнын жаңа «барлығының Интернеті» ұғымы басатынын, яғни кез келген заттар мен сервистер ғаламторға енгізілуі мүмкін екендігін алға тартты. Мұнан бөлек, Қазақстандағы «Huawei» компаниясы корпоративтік сату департаменті бас директорының орынбасары Zhao Hongbin, reactor.ua тұғырнамасының құрылтайшысы Евгений Саранцов, Ұлы Петр атындағы Санкт-Петербург политехникалық университетінің аға оқытушысы Наиль Гафуровтар сөз алып, тақырып аясында әңгіме өрбітті.
ІІІ халықаралық интернет-форум аясында бірқатар әріптестік туралы меморандумға қол қойылды. Мәселен, «Astana Hub» Халықаралық стартап-хаб ұйымымен IT-жобаларды жүзеге асыру туралы, «Какаду Девелопмент» ЖАҚ «Smart city» технологияларын енгізу туралы, сондай-ақ, «Барс групп» және «Транстелеком» компанияларымен цифрландыру бойынша жобаларды жүзеге асыру туралы меморандумдарға қол қойылды.

«ЖЖ» ақпарат.