Қарағандыда Lexus тізгіндеген мас жүргізуші 5 көлікпен соқтығысып, ұйықтап қалған
Қарағандыда жол талғамайтын көлікті тізгіндеген жүргізуші жол апатын жасап, үйдің ауласындағы тұрақта тұрған 5 көлікпен соқтығысқан. Бір қызығы, мұнан кейін ер адам ұйықтап қалыпты. Ол оқиға кезінде мас болған екен, деп хабарлайды Stan.kz ақпарат агенттігінің тілшісі.Белгілі болғандай, оқиға 20 қазанда түнгі сағат 21:00 шамасында орын алған. Lexus 570 маркалы көлікті тізгіндеген ер адам аулада тұрған 5 көлікпен соқтығысып, ұйықтап қалыпты.Желіде оқиғаның видеосы тарады. Видео кадрларынан тәртіп сақшыларының жүргізушіден көліктен шығуын сұрағаны көрінеді. Алайда жүргізуші олардың талабын орындаудан бас тартты. Сол кезде полицейлер оны көліктен күштеп шығарып алып, полиция көлігіне алып барды.
Облыстық полиция департаментінің мәліметінше, жол-көлік оқиғасының салдарынан 25 жастағы жігіт пен 29 жастағы қыз зардап шегіпті. Олар ауруханаға жеткізілген.
«102 пультіне жүргізушінің тұрақта тұрған көліктермен соқтығысып, ұйықтап қалғаны туралы хабарлама түсті. Полиция қызметкерлері оқиға орнында анықтағандай, Lexus 570 көлігінің 49 жастағы жүргізушісі мас күйінде тұрақта тұрған 5 көлікпен соқтығысқан», - дейді полициядағылар.
Аталған дерек Қылмыстық кодекстің «Көлiк құралдарын басқаратын адамдардың жол жүрісі немесе көлiк құралдарын пайдалану ережелерін бұзуы» бабы бойынша тіркелді. Тиісті сараптамалар тағайындалып, тергеу жүргізілуде.
stan.kz
