Ықылым заманнан келе жатқан «Білекті бірді жығар, білімді мыңды жығар» деген сөз бар. Дана халықтың бұл сөзі бүгінгі заманның ұранына айналды десек те артық айтпаймыз. Өйткені, бұл – білекке емес, білімге сенетін заман.

Ал бүгінгі жас ұрпақ білімді болса, елдің келешегі кемел болары ақиқат. Себебі қай заманды алып қарасақ та қоғамның қозғаушы күші – жастар. Тұңғыш Президенттің Жолдауларының басым бағыттары жастармен тікелей байланысты болуы, кез келген мемлекеттік маңызы бар стратегиялары мен мақалаларында, сөздерінде өскелең ұрпақты тілге тиек етуі – осының айқын дәлелі. Расында, мемлекет жастарға барлық мәселеде қолдау білдіріп, мүмкіндік жасауда. Білім жүйесінде де гранттардың саны артып, шетелде білім алуына мол мүмкіндік бар. Көптеген жастар ұйымдары мен құрылымдары қызмет жасайды. Заманауи білім беру жүйесі қалыптасып, зияткерлік мектептер, Елордада халықаралық университет ашылды. Жыл сайын мыңдаған студент әлемнің үздік университеттеріне оқуға кетіп жатыр. Осының барлығы жастардың жаһандық дәуірде бәсекеге қабілетті мемлекеттің негізін қалауына жол ашады.

Бұл жөнінде Елбасы Н.Назарбаев «Болашаққа бағдар: рухани жаңғыру» атты бағдарламалық мақаласында да айрықша көрсетіп берді. Тарқатып айтсақ, «Болашақта ұлттың табысты болуы оның табиғи байлығымен емес, адамдардың бәсекелік қабілетімен ай­қындалады. Сондықтан әрбір қазақ­­стандық, сол арқылы тұтас ұлт ХХІ ғасырға лайықты қасиеттерге ие болуы керек. Мысалы, компьютерлік сауат­­тылық, шет тілдерін білу, мә­дени ашықтық сияқты факторлар әр­кімнің алға басуына сөзсіз қажетті ал­ғышарттардың санатында» де­ген болатын. Мұндағы негізгі ой – бі­лім бәйгесінде биіктен көрінетін бі­лікті маман, жаңа әлемнің сандық технологияларын жетік меңгерген, уа­қыт талабына сай, кез келген кезеңде бә­секеге дайын тұлға қалыптастыру. Мемлекет басшысы әу бастан-ақ бі­лімге айрықша назар аударды. Өйт­кені білім – сауатты болудың ірге­тасы ғана емес, кемелденіп, келе­шекке нық қадам басқан әлемнің алпауыт елдерімен те­резе теңестірудің күретамыры, алтын көпірі.

Шүкір, біздің аудан білім саласында көш басында. Бірнеше жылдан бері жыл қорытындысымен облыста үз­діктер қатарынан көрініп келеді. Ау­дан мерейінің асып, абы­ройының асқақтауында осы сала қыз­мет­кер­лерінің еңбегі зор. Жыл сайын білікті де білімді, бәсекеге қабі­летті тұлға қа­лыптастырып, талай шә­кіртті ұядан ұшырып отырған, жұ­мысы жүйелі мектептердің бірі – Ш.Ерма­ғанбетова атындағы №246 орта мек­теп. Бұл мектеп туралы айтарда Шекер апа­мыздың еселі еңбегіне тоқ­талып өтпеу мүмкін емес.

Өзінің еңбек жолын өткен ғасырдың 20-шы жылдарында Қызылорда округ­тік қосшылар одағынан бастаған Шекер апай кейін кеңес-партия және ауыл шаруашылығы мектептерін тә­мам­­дап, жаңа өкіметтің қызметіне қызу араласады. Сол бойда алдымен Оңтүстік Қазақстан облыстық жастар комитетінің әйелдер бөлімін басқарады. Осы тұста ол отбасы және әйелдер құқығын қорғау, жаппай сауатын ашып, жауапты қызметтерге тағайындау, білім және мәдени ошақтарды тұрғызу секілді жұмыстардың алдыңғы қатарында жүреді. Ел арасында қызметке деген белсенділігінің арқасында көп ұзамай Қазалы аудандық атқару комитетінің председателі, одан кейін Жаңақорған аудандық пар­тия комитетінің бірінші секре­тар­ы болып сайланады. Озық ұйымдас­тырушылық, іскерлік қабіле­ті көптің көңілінен шығып, 1938 жылы Қазақ ССР Жо­ғарғы Кеңесіне табаны күректей 27 жыл депутат болса, 17 жыл бойына Республика Жоғарғы Кеңесінің бірінші сессиясында Қазақ ССР Жоғарғы Кеңесі Президиумы төрағасының орынбасары болып сай­ланған. Жастық шағы соғыс жыл­дарымен тұспа-тұс келсе де, білімсіздің күні қараң екенін түсінген Шекер Ермағанбетова қиындықты еңсеріп, саналы ғұмырын білім саласына да арнады.

Мемлекет және қоғам қайраткері, жерлесіміздің есімі берілген аудан орталығындағы №246 орта мектепте осы кісінінің атында музей жұмыс жасап тұр. Мұнда қайраткер туралы қалам тербеген журналистердің еңбектері, бірнеше жеке құжаты мен тұтынған зат­тары орналасқан.

Мектептің іргесі 1975 жылы қалан­ған. Алғашқы оқу жылында 12 мұғалім ұстаздық етіп, 18 оқушы білім алған екен. Жаңа ұжымды Рсалды Ақмолдаева басқарған. Ең алғаш еңбек еткен ұстаздардың қатарында Абылай Мырзалиев, Аманғали Монтин, Айтбай Жетібаев, Мәлике Әбденова, Қымбат Кәрібаева, Қатша Әбдікәрімова, Дина Мейірманова, Бәйтәй Бисенбаев, Клара Қосынова, Роза Ағарбаева, Ұлжан Жүсіпова, Сәбит Романқұлов сынды білікті мамандар болды. Мек­теп тарихында әр жылдары бас­шы­лық қызметте болған Рсалды Ақмол­даева, Ғалия Нүркенова, Роза Исахметова, Оспан Есенәлиев, Райхан Әзбергенова, Клара Ілиясова, Жұмакүл Маншарипова, Гүлзат Құрман­бае­ва­лар­дың да қайрат­кер атындағы білім ошағының өз атына лайық болуында, за­манның бейімделген тұлғаларын қалыптастыруда, ауданның білім са­ла­сының дамуы жолында сіңірген еңбектері орасан. Абырой биігінен түспеген алтын ұяны қазіргі таңда Айнұр Айбосынова басқарады. Ау­дан­дағы талай шәкірттердің талабын ұштаған шежірелі мектеп ұжымы әлі де жаңашылдығымен, жемісті жұ­мы­сымен, игі істерімен танылуда. Мек­тепте бүгінде 70 мұғалімнен 427 шә­кірт білім алуда. Заманауи талапқа сай жабдықталған 25 оқу кабинеті, 1 мәжіліс залы, 1 спорт залы, 1 кітапхана, 1 асхана, 1 мультимедиа кабинеті, 1 информатика, 5 интерактивті кабинет және 3 шеберхана жұмыс жасайды.

Бұдан бөлек оқушылардың таным-түйсігін дамытуға, цифрлық білім беру мен робототехиканың қыр-сы­рын меңгертуге бағытталған үйірме жұ­мыс жасайды. Жаңа технологияны білуге құмартқан 30 оқушы кесте бойынша робот құрастыруды үйреніп жүр. Информатика пәнінің мұғалімі Жайдарбек Баймаханов осы үйірмеге жетекшілік етеді. Балалардың же­тістігі де жоқ емес. Биылғы оқу жы­лында «SHABYT ART» студиясына жастарды үйірмеге тарту мақсатында «Талантыңмен таныл» атты өнер фестивалі ұйымдастырылған. Байқау барысында «Робототехника» жанры бойынша үздік өнер көрсеткен осы үйірменің қатысушылары – Жақсылық Данияр, Мұсахан Бахтияр, Мнаж Эльдар арнайы дипломмен марапатталған. Бұл, әрине, мектеп ұжымы үшін зор мақтаныш, ұстаздардың тынымсыз еңбегінің, оқушылардың қабілетінің жемісі деуге болады. Талай таланттың талабын шыңдаған білім ордасының алар асуы, шығар биігі, бағындырар белесі әлі алда деп ойлаймыз.