Қай кезді алып қарасаң да қоғамның қозғаушы күші – жас­тар. Демек, бүгінгі күн де, ертең де, болашақ та жастардың қолында. Келешегіміздің келбетті, болашағымыздың баянды болуы тікелей жастарға байланыс­ты. Өйткені, олар – ертеңімізді жасайтын бүгініміз. Қазіргі уақыт адамзат биігін білекпен емес, біліммен бағындыратын заман. Елбасы Жолдауларының басым бағыттары жастарға тікелей байланысты болуы, кез келген мемлекеттік маңызы бар стратегиялары мен мақалаларында, сөздерінде өскелең ұрпақты тілге тиек етуі – осының айқын дәлелі.

Аудан орталығындағы Қ.Қазантаев атындағы мәде­ниет үйінде «Жастар – мәңгілік ел мұраты» атты жас педагогтардың облыстық форумы өтті. Оған аудан әкімінің орынбасары Жағыпар Тажмаханов, кәсіподақ комитетінің төрайымы, облыстық мәслихат депутаты Райкүл Байназарова, кеш қонақтары және жалағаштық үздік жас педагогтар қатысты. Салтанатты шарада педагогтарды аудан әкімінің орынбасары Жағыпар Айтбайұлы елде бүгінгі жастарға мемлекет тарапынан көптеген қолдаулар жасалып жатқанын атап, жастар жылының маңыздылығына тоқталды.

– Өздеріңізге белгілі, бүгінгі білім саласында аса қарқынды жылдамдықпен өзгерістер орын алуда. Мұндай жағдайда білім беруді болашақтың даму тенденцияларына бағыттау, жаңа экономика талаптарына лайықтау міндеті бәрінен басым түсетін, баршаға ортақ аса маңызды миссияға айналуда. Шындығына келгенде, біз балаларды қазіргі экономика үшін емес, келбеті енді ғана айқындалып келе жатқан мүлде жаңа, қатаң бәсекеге негізделген, жасампаз экономикалық ортадағы өмірге әзірлеуіміз керек. Сондықтан, уақыттан да оза жүруге жұмыс жасау қажет, – деді ол.

Шарада жас ұстаздар №123 мектеп-лицейінің бастауыш сынып мұғалімі Құралай Мамзадаева, №38 мектептің орыс тілі пәні мұғалімі Жарқынай Садық, №123 мектеп-лицейінің тарих пәні мұғалімі Ермұрат Каналхан, жерлесіміз Тұран университетінің оқытушысы, кинотанушы, профессор Гүлзат Көбек, аудармашы, психолог, Рухани жаңғыру бағытындағы «100 жаңа есім» жобасының жеңімпазы, «Bilim foundation» қорының директоры Сымбат Әбдрахманова, ауданымыздың түлегі, әл-Фараби атындағы Қазақ ұлттық университетінің І курс студенті, республикалық «Жас патриот­тар» академиясының мүшесі Жаннұр Бекболат Елбасының жастар саясатын жүргізудегі ірі бастамаларын қолдап, ел игілігі үшін аянбай еңбек ете беретінін жеткізді. Сонымен бірге, салтанатты жиында ауданның рухани дамуына үлес қосып, жастардың бойына отансүйгіштік, жауапкершілік қасиеттерін қалыптастыруға бағыт-бағдар беріп, әрқашан демеушілік жасаған жерлесіміз Гүлзат Көбек ауданның мерекелік медалімен және аудан әкімінің «Алғыс хатымен», жастар форумының секция жұмысында ой бөлісіп, форумның жоғары деңгейде өтуіне үлес қосқан Сымбат Әбдрахманова, ауданымыздың түлегі, әл-Фараби атындағы Қазақ ұлттық университетінің І курс студенті Жаннұр Бекболат, мемлекеттік жастар саясатын жүзеге асыруда елеулі еңбек етіп, қоғамдық жұмыстарға белсене қатысып жүрген жас педагогтар аудан әкімінің «Алғыс хатымен» марапатталды. Мұнан бөлек, облыстық кәсіподақ комитетінің төрайымы, облыстық мәслихат депутаты Райкүл Мансұрқызы жас отбасыларға елордамыз «Нұр-Сұлтан» қаласына демалысқа жолдама тапсырса, ауданның түлегі Гүлзат Көбек ең білікті жас педагогқа жүз мың теңге көлемінде сыйақы ұсынатынын айтты.

Форум соңында аудандық кәсіподақ коми­тетінің жанынан құрылған «Жалын» жастар кеңесінің төрағасы Жасұлан Серік облыс бойы­н­ша білім саласындағы Жастар жылының кезекті эстафетасын Арал ауданына салтанатты түрде тапсырды.

Айта кетейік, осыған дейін аудандағы іргелі білім ошақтарының бірі №202 орта мектепте форумның 1-ші отырысы өткен болатын. Онда «Адам капиталының дамуы: негізгі құндылықтар және көшбасшылық қа­сиеттерді дамыту», «Жастардың пси­хо­ло­гия­лық проблемалары, ­жас­тар арасында пси­хологиялық жұмыс жүргізудің бағыттары, пси­хологиялық мәселелерді ше­шу­дің басты қадамдары» тақырыбында еркін әңгімелесу ұйымдастырылды.