Қызылордалықтардың күзгі науқанды бастап кеткеніне де біршама уақыт болды. Бұған дейін ауыл шаруашылығы саласында аты озған аймақтың берекелі өнімі өткен аптаның соңында елордаға жеткізілді. Нұр-Сұлтан төрінде өткен жәрмеңкеде ерке Есілге Сырдың сыйы барып, елордалықтар ыстық ықыласпен қабылдады.

Биыл Сыр халқы үшін күзгі науқан табысты басталды. Аймақта бүгінге дейін 4 716 гектар күрішке орақ түсіп, оның 2 495 гектары бастырылды. Әр гектарынан орташа 42,3 центнерден өнім алынуда.

Елордадағы «Хан Шатыр» жанындағы жәрмеңке алаңына жиналған халыққа об­лыстан жеткен өнімдер нарықтық ба­ғадан 10-15 пайыз төмен бағамен ұсы­ныл­ды. Жәрмеңкеге 450 тоннадан астам 29 түрлі өнім келген.

– Біздің облыс күрішпен танымал ғой. Жәрмеңкеге 150 тоннадан астам күріш әкелдік. «Лидер» сортынан. Халық жақсы алып жатыр. Одан бөлек, 14 тоннадан астам балық, 150 тоннадан аса бау-бақша өнімі бар. Тауарларымыздың жал­пы құны 100 млн теңгеден асады, – деді облыстық ауыл шаруашылығы басқар­масының басшысы Талғат Дүйсебаев.

Жәрмеңкеде елордалықтарға таң­сық біршама өнім түрлері ұсынылды. Олардың қатарында жантақ балы мен қауынқақ та бар.

– Өзім Қызылорданың тумасымын, 2002 жылдан бері елордада тұрамын. Сырдың жәрмеңкесі болатынын естіп, арнайы келдік. Келе сала қауын сатып алдым. Мынадай әміре, қара қауын, күләбі дегенді мұнда кездестірмейсің. Бағасы да жап-жақсы екен, – дейді қала тұрғыны Айдарбек Есов.

Нұр-Сұлтан қаласын өзіндік думанға бөлеген ауқымды шараға жаңбырлы ауа-райына қарамастан тұрғындар көп жиналды. Жәрмеңкені аралай жүріп, Аралдың балығы мен Қазалының кон­феті, Қармақшы мен Жаңақорғанның қа­уын-қарбызына, Жалағаштың күрішіне сұра­ныс жоғары екенін анық байқауға болады.

– Қызылорда облысы ауыл шаруа­шылық жәрмеңкесін өткізеді деген ха­бар­ды әлеуметтік желіден көргеннен бас­тап бұл күнді асыға күттік. Сырдың дәмін алыста жүріп аңсайтынымыз рас. Сондықтан ерте келіп, күріш пен қауын-қарбыздан, ет пен құрт-ірімшікті барынша көп етіп алдық. Күн суық болғанмен, жәрмеңкедегі көңіліміз көтеріңкі, – дейді астаналық Нұрхан Тасболат.

Айта кетейік, игі шараға облыстан 140 тонна күріш, 20 тонна балық, 150 тонна бақша өнімдері, 40 тонна көкөніс пен жеміс-жидек, 5 тонна сүт және кон­ди­тер өнімдерін әкелген. Жәрмеңкеге об­лыстың 7 ауданы мен Қызылорда қаласы және «Байқоңыр» ӘКК» АҚ қатысты.

Екі күнге жалғасқан жәрмеңкеде ка­ран­тин талаптары сақталып, тауар ұсынушылар дезинфекциялық құрал­дар­мен толық қамтылды. Жалпы Қы­зыл­орда өңірінде ауыл шаруашылық өнімдерін өндіру және агроөнеркәсіптік кешен қыз­метін тиімді жүргізу мәселелері жолға қойылған. Соңғы 10 жылда облыстың жалпы өңірлік өнім құрылымдағы ауыл шаруашылығының үлесі 4,3 пайыздан 5,9 пайызға дейін ұлғайған.

Мал шаруашылығын дамыту бойын­ша да жүйелі жұмыстар жүргізіліп, нә­ти­жесінде ірі қара мал басы 1,5 есе, жылқы 2,3 есе, түйе 2 есе өскен. Биыл да облыстың жалпы егін көлемі 3,9 мың гектарға ұлғайып, барлығы 188,1 мың гектар жерге ауыл шаруашылығы дақылдары орналастырылған. Оның ішін­де дәндi дақылдар 96,6 мың гектар, майлы дақылдар 6,7 мың гектар, мал азықтық дақылдар 66,4 мың гектар, картоп, көкөнiс, бақша 18,3 мың гектарды құрады. Негізгі дақыл күрiштің көлемі – 83,6 мың гектар.