Аптаның сейсенбісінде аудан әкімдігінде аппарат мәжілісі өтті. Аудан әкімі Асылбек Шаменовтың төрағалығымен өткен жиында екі мәселе көтеріліп, тиісті сала басшыларының баяндамалары тыңдалды. Жиында аудандық жұмыспен қамту, әлеуметтік бағдарламалар және азаматтық хал актілерін тіркеу бөлімінің басшысы Эльмира Құттымбетова «Мүгедектерге кедергісіз орта» қалыптастыру бағытында атқарылған жұмыстарға тоқталды. Э.Мергенбайқызының хабарламасында халықтың қимылы шектеулі топтары үшін «кедергісіз орта» 5 тармақ бойынша қамтылатыны айтылды.

– Жалпы мүмкіндігі шектеулі жандар үшін кедергісіз орта қалыптастыру маңызды. Әсіресе олардың қоғаммен араласуында еш кедергі бол­мауы тиіс. Осы топтағы адамдарға кедергісіз орта қалыптастыру бағытындағы жұмыстардың ал­ғаш­­қысы барлық объектінің кіреберісіндегі пан­дус пен кіретін есік, табалдырыққа байла­ныс­ты талаптардың сақталуы. Тарқатып айтсақ, пан­дустың беті тайғаққа қарсы жабындымен жаб­­дық­талып, екі жағында 2 қатар тұтқа жүр­гізілуі тиіс. Оның биіктігі 90 см, астындағы тұт­қа­ның биік­тігі 70 см болуы шарт, пандустың жо­ғарғы және тө­менгі деңгейлерінде тактильдік ес­­­­кер­ту жолақтары орнатылуы керек. Пандустың тұт­­қалары дөңгелек, диаметрі 3,5-4,5 см аралы­ғын­да дөңгелек қимадай жасалуы қажет. Сонымен бірге баспалдақтың алдында ені 30 см-дан бастап 50 см-ға дейін тактильдік ескерту жолақтарын қа­рас­тыру керек. Пандустың биіктігіне сәйкес ұзын­дығы 1/12 қатынаста болуы ұсынылады. Мысалы, пандус биіктігі 80 см болса, ұзындығы 6 м 67 см болуы керек. Ал объектінің кіреберісіндегі есік табал­дырығы деңгейінің биіктігі 1,4 см-дан аспауы тиіс.

Жалпы аудан бойынша 935 мүмкіндігі шек­теулі азамат бар. Оның 105-і 1 топ, 253-і 2 топ, 372-сі 3 топ мүгедектері және 205-і 16 жасқа де­йінгі ерекше күтімдегі балалар. Мұның ішінде зей­неткерлік жастағы мүгедектер 279 адам, ең­бекке қабілетті жастағы мүгедектер саны – 451. Олар ерекшелік топтарына қа­рай қажетті құрал-жабдықтармен қамтамасыз еті­­ліп тұрады, – деген бөлім басшысы қоғамдық маңызы бар мекемелердегі пандустардың әлі де аталған та­лап­­тарға сай еместігін, яғни кемшіліктер анық­тал­ғанын да айта кетті.

Осы жылы Еңбек, әлеуметтік қорғау және көші-қон комитетінің Қызылорда облысы бойын­ша де­партаменті қызметкерлері аудандағы 32 нысанға мони­торинг жұмыстарын жүргізіп, бірқатар кем­ші­ліктерге куә болыпты. Атап айтсақ, аудан әкімі аппараты мен Мақпалкөл ауылдық округі әкімі аппаратынан басқа, кент және ауылдық округ­тер­де мекеменің атаулары брайль қарпінде жа­зыл­маған. Ал бес мекемеде мүмкіндігі шектеулі жандарға арнаулы орын белгіленбесе, мұнан бөлек стандартқа сай келмейтін пандустар орнатыл­ған мекемелер де анықталған. Мониторинг жұмыста­ры­ның нәтижесінде кей объект аумағында осы топтағы жандардың автокөлігіне арналған авто­тұрақ орны да белгіленбепті. Мұндай кем­шіліктер тек мекемелерде ғана емес, ауыл әкім­ші­ліктерінде де кездеседі. Мәселен, Аламесек ауылдық округінде автотұрақ жоқ болса, Бұқар­бай батыр, М.Шәменов, Жаңадария, Еңбек, Таң ауылдық округтерінде мүгедектерге ар­нау­­лы орын белгіленбеген, авто­тұрақ жоқ, қыз­мет­кер­лерді шақыруға арналған қоңырау белгісі, мүгедектерге жолды бағдарлауына арналған тактильді тақтайшалар, плиткалар, тіпті ленталар қойылмаған. Осындай олқылықтар бөлімдерде, білім беру, денсаулық сақтау және қоғамдық маңызы бар мекемелерде де кездеседі.

Аудан әкімі Асылбек Өмірбекұлы аталған кем­шілік кездескен мекеме, бөлім басшылары мен ауыл әкімдеріне жағдайды реттеу жөнінде ескер­ту жасады. Онсызда тағдыр тәлкегіне ұшыраған жандардың өмірін қиындатпауды қатаң тапсырған өңір басшысы осы ескертуді жыл аяғына дейін орындау қажеттігін қаперге салды.

Ал күн тәртібіндегі екінші мәселе бойынша аудандық ішкі саясат бөлімінің басшысы Шара­бан Қалыбаевтың хабарламасы тыңдалды. Бө­лім басшысы 1 желтоқсан – Қазақстан Рес­пуб­­­ликасының Тұңғыш Президенті күні және 16 желтоқсан – Қазақстан Республикасы Тәуел­сіздігінің 30 жылдығына орай өтетін шаралар легінен хабардар етті.

Шарабан Мақсұтұлының айтуынша, қыстың бі­рін­ші күні, яғни Тұңғыш Президент күніне орай ау­дандық мәдениет және тілдерді дамыту бөлі­мі­нің ұйымдастыруымен сурет, кітап көрме­лері және тақырыптық кеш өткізілетін болады. Ұлт көш­басшысының қызметін ұлықтау мақса­тын­да­ғы шара Қ.Қазантаев атындағы мәдениет үйінде «Ұлт көшбасшысы» атты салтанатты жиынмен қоры­тын­дыланбақ.

Ал ата-баба аңсап өткен азаттық таңы атқан күн – 16 желтоқсан – тәуелсіздік күнінің 30 жылдығына орай «Тәуелсіздік таңы мәңгілік» тақырыбында дөңгелек үстел, «Елімнің бақытын тербеткен – Тәуелсіздік» атты тақырыптық кеш, «Желбіресін тәуелсіздік байрағы» тақырыбында сурет байқауы, сондай-ақ «Бостандықтың бой­тұмары – Желтоқсан» тақырыбында кітап көр­мелері ұйымдастырылмақ. Мерекеге орай, ау­дан­дық жастар ресурстық орта­лығы, кент және ауылдық округ әкімдері әлеуметтік желілерде #Тәуелсіз елге мың алғыс, #Тәуелсіздікке 30 жыл, #Тәуелсіз елдің жастары хэштегтері арқылы білім, мәдениет, спорт және басқа да сала­ларда жетістікке жеткен жастардың пікір­лерін, видео­құттықтауларын және лебіздерін жария­ламақ. Бұдан бөлек «Тәуелсіздік – ұлы да­ла аманаты» атты салтанатты мерекелік шара, теат­рлан­дырылған қойылым ұсыну да жоспар­ланған.

Ал мерекеге тарту ретінде аудан орталығынан жаңадан салынған Рәміздер аллеясы және 10 тұр­ғын үй пайдалануға берілмек. Аудан хал­қы­­­ның мерекелік көңіл-күйі мұнымен толас­та­май­ды. Желтоқсан айында дарынды жастарды ын­та­ландыру және қолдау мақсатында ау­дан әкімінің «Жалын» жастар сыйлығы да табыс­талмақ.

Аппарат жиынында көтерілген мәселелерге байланысты сын-ескертпелер де айтылды. Әсі­ресе аудан әкімінің назарына іліккен мәселеге қатысты тапсырманы ауыл әкім­­деріне енді жыл аяғына дейін орындау қатаң ескертілді. Шешіл­мейтін түйін жоқ екенін айтқан өңір басшысы сынықтан сылтау іздегенше, мәселенің мәнісіне үңіліп, нәтижеге жетуді тілге тиек етті. Ал жауапкершілік бар жерде жүйелі жұмыс та, оң нәтиже де болатыны бесенеден белгілі.