Тәуелсіздік тағылымы
Қазақстан Республикасының Тұңғыш Президенті, Елбасы Н.Ә.Назарбаевтың еліміздің бас газеті «Егемен Қазақстанға» «Тәуелсіздік тағылымы» атты саяси-тарихи мақаласы жарық көрді. Елбасымыз Нұрсұлтан Әбішұлы Назарбаев «Тәуелсіздік тағылымы» атты мақаласында еліміздің басынан өткерген барлық тарихи оқиғаларды жеткізген. Ия, біздің еліміз талай тар жол, тайғақ кешулерден өтті. Ата-баба арманы болған Тәуелсіздікке қол жеткізу жолы оңай болмады. Бабаларымыз талай ғасырлық қиындықтардан өтіп, бізге шексіз, шетсіз мол жерді аманаттап кетті. Тұңғыш Президентіміз Н.Назарбаев сол мол жердің шекарасын шегендеп, алдағы уақытта ешқандай дау туындамайтындай бекітті. Егеменді 30 жыл ішінде еліміз әлемге танылып, дамыған елдердің қатарына қосылды. Экономикамыз көтеріліп, халықтың тұрмыс жағдайы жақсарды. . Мінеки, ел болып, тереземіз басқа жұртпен тең болып, халықаралық деңгейде толыққанды мойындалған мемлекет ретінде өмір сүріп жатқанымызға да 30 жылдың жүзі болып отыр. Тарих үшін соншалықты көп уақыт болмаса да, осы жылдар ішінде ғасырларға бергісіз қыруар істер атқарылды. Экономикалық-әлеуметтік, саяси, қауіпсіздік мәселелерінде, оның ішінде жаһандық, өңірлік проблемаларға қатысты өз алдына дербес шешім қабылдай алатын, өз ұстанымына берік егемен мемлекет бола алатынымызды барлық қырынан айқындап, мойындаттық. Қазақ деген халықтың өресі биік, өрісі кең екенін әлем жұрты білді.Тәуелсіз елдің жас ұрпағы осы ерең еңбекті ешқашан ұмытпауы тиіс. Бізге енді тек елімізді дамыту жолында бірлесе еңбек етіп, мәңгілік елімізді сақтап, келесі ұрпаққа аманаттауымыз қажет. Тұғырлы Тәуелсіздігіміз мәңгі болғай!
Құрметті жерлестер! Баршаңызды Тәуелсіздік мерекесімен шын жүректен құттықтаймын. Еліміз аман, татулығымыз бекем болсын!
АХАН КЕНЖЕБАЕВ
Жалағаш аудандық мәслихатттағы «Nur Otan» партиясы депутаттық фракциясы жетекшісінің орынбасары, «Nur Otan» партиясы аудандық филиалы жанындағы Сыбайлас жемқорлыққа қарсы іс-қимыл жөніндегі қоғамдық кеңес төрағасы
