Өз өңірімізден шағын болса да өндіріс ошағын көрсек, марқайып қаламыз. Әсіресе кәсіпорындар қатарының ауылдық елді мекендерде көптеп шоғырланғаны кімге болса да тиімді. Себебі ондағы халықтың әлеуетін арттырып, тұрмыс сапасын жақсартуда бұл – таптырмас мүмкіндік. Бір жағынан ондағы жұмыссыздық мәселесінің алдын алуға да кәсіпкерлік саласының алға басуы үлкен сеп болары анық.

Соңғы жылдары Бұқарбай ба­тыр ауылының тұрғындары кә­сіп­керлік саласында бұған дейін қолға алынбаған жарқын жоба­лар­ды жүзеге асыруды дәстүрге ай­налдырып келеді. Естеріңізде болса, былтыр батыр атындағы ауылда пескоблоктың бірнеше түрін өндіретін серіктестік жұ­мы­сын ақпараттандырған болатын­быз. Кеше аудан іргесіндегі ауыл­ға сапарымызда кондитерлік өнім өндіретін жаңа цехтың қазіргі жұ­мысымен таныстық.

Кәсіпкерлік саласына серпін бе­ретін мемлекеттік бағдарла­маларды батыр атындағы ауыл­­­дың халқы тиімді пайдала­нып отыр. Бұл сөзімізге соңғы жыл­дары мемлекеттік бағдар­ла­ма­лар мүмкіндігімен іс бастаған бұқар­байлықтардың жарқын жобасы дәлел болары анық. Солардың бірі – ауыл тұрғыны Самұрат Шайхыслам.

Ол бұған дейін Алматы қала­сындағы кондитерлік өнімдер өн­ді­ретін алып цехта жұмыс жа­са­ған. Кәсіптің бұл түрінде үл­кен пайда барын жете түсінген жер­лесіміз кейін елге қайтып, са­лада бақ сынауға бел буады. Осылайша өзінің туған жері Бұ­қарбай батыр ауылында конди­терлік өнім өндіретін кәсіпорын ашуды жоспарлайды. Алайда ке­йіп­керімізге бұл жобаны жүзеге асы­руға қаржы тапшылығы ай­тар­лықтай қолбайлау болған. Мақ­­сатын жүзеге асыру үшін мем­­лекеттік бағдарлама көмегіне жү­гінгені де сондықтан.

“Бизнестің жол картасы – 2025” мем­лекеттік бағдарламасымен Са­­­мұ­­раттың бұл жобасы қолдау тапты. Комиссия мүшелерінің “Кон­ди­терлік өнім өндіру” жобасын бір­а­уыздан қолдайтындай реті бар. Себебі оны автор үлкен ізденіспен жасаған. Тіпті ол үшін тәжірибе жинау мақсатында Түркия мем­лекетінде арнайы оқудан өткен. Осылайша кейіпкеріміз қайта­рым­сыз грантқа қол жеткізді.

– Бастапқыда менде “Ауылдық жерде өнімнің бұл түріне сұраныс қалай болады?” деген сауал туын­дады. Десе де тәуекелге бел буып, жұмысты бастап кеттім. Қазір соның жемісін көріп отыр­мын. Алғашында цехта өн­діріл­ген өнімді ауыл тұрғын­дары та­ла­сып алды. Кейін аудан және облыс орталығындағы ірі сауда орындарынан сұраныс түсе бас­тады. Қазір оларды да өз өні­мім­мен қамтамасыз етіп отыр­мын. Әзірге печеньенің 7-8 түрін шығарып жатырмын. Ал мерекелер қарсаңында кондитерлік өнімнің басқа да түрлерін өндіреміз. Се­бебі ол күндері сұраныс көп бо­лады. Кейде өзіміздің аудан орта­лығындағы сауда орындары ие­­­лерінде “ертең өз өнімімен бізді қам­тамасыз ете алмайды” деген бір­жақты көзқарас та қалыптасып жатады. Алайда менің толық мүм­­кіндігім бар, – дейді жас кәсіпкер.

Кәсіпорын жұмысымен та­ны­су барысында бұл сөзді кейіп­ке­­ріміздің жай ғана тұтынушы тар­ту мақсатында айтпағанына көз жеткіздік. Расында қандай кө­лем­де болсын тапсырысты қам­­тамасыз етуге шағын цехтың қау­һары жетеді. Себебі кә­сіп­орын заманауи үлгідегі кон­ди­тер­­лік өнімнің кез келген тү­рін өн­діруге арналған арнайы аппа­раттармен жарақталған. Оған Са­­мұрат Бектасұлы мемлекеттік бағ­дарлама шеңберінде алған 4 млн 900 мың теңге қайтарымсыз қа­ражат арқылы қол жеткізген.

Жас кәсіпкер қазіргі таңда 2 азаматты жұмыспен қамтып отыр. Алдағы уақытта мұндағы өнімге тұтынушылар тарапынан сұраныс артса, кәсіпорын көкжиегін ке­ңей­ту де жоспарда бар екен. Цехта қазір өндіріліп жатқан печеньенің бағасы 1000-1500 теңгеден ас­пайды. Ал торттардың көлемі мен түріне қарай бағасы да әрқалай.

Былтыр желтоқсан айының ор­тасында жұмысын бастаған жо­баның болашағы жарқын. Се­бе­бі “Сыр Дәмінде” өндірілген өнімге уақыт өткен сайын сұраныс та артып келеді. Бастапқыда тап­сырыс беруші ірі сауда орын­дарының иелері кәсіпкерге “алып­сатар” деп күмәнмен қарапты. Ал біз кәсіпорынға барып, оның алып­сатар емес екеніне көз жеткіздік.

Ауданда негізінен бұрын қолға алын­баған жобаларды жүзеге асыр­­­­­­­ған жөн. Бәсеке де керек, алай­­­­да тың жобаларды қолға ал­ған адамның шаруасының ши­рауы­­на көп уақыт қажет емес. Бұ­­­ған батыр атындағы ауылдың хал­­­қы көз жеткізген.