Бұл күнде елдегі жұмыссыздық көпшіліктің бас қатырар мәселесі болып отырғаны жасырын емес. Екі қолға бір күрек таппай сенделгендер – қоғамдағы түйткілдің ең күрделісі. Алайда оның шешілу жолдары жоқ емес. Егер ынталы азаматтар бар болса, мемлекеттік бағдарламалар сол мұқтаж азаматтарға көмекке келеді. Бұл тұрғыда жаңа бизнес идеяларды жүзеге асыру бағытында «Бастау», «Еңбек» мемлекеттік бағдарламаларының орны ерекше. Қайтарымсыз гранттар алу арқылы жұмыссыз азаматтар өз кәсіптерін ашып, бүгінде оның игілігін көруде. Мұның бәрі жұмыссыз азаматтарға зор мүмкіндік беріп, қоғамға масыл болудан сақтайтын шаралар екені анық.

Бұл бағыттағы қоғамда шешімін табуы тиіс күрделі мәселелерге маңыз беріп, оны түбегейлі қадағалап отыратын жетекші партия – «Amanat». Елдің аманатын арқалаған партияның бел­сенді өкілдері тұрақты түрде әр сала же­текшілерінің атқарған жұмыстарына тал­дау жасап, халықтың жан айқайын құ­зырлы орынға жеткізіп, оның оңтайлы шешілу жолына бағыттап, біте қайнасып жұмыс жасайды. Аманаттықтардың ар­найы бекіткен бағдарламалары – соның айғағы.

Кеше өткізілген «Amanat» партиясы Жалағаш аудандық филиалының жа­нын­­­дағы «Әлеуметтік қамту мәсе­ле­лері» жөніндегі қоғамдық кеңес отыры­сында қарапайым халықтың мүддесін қозғайтын бірқатар мәселе назарға алынды. Жиынға аудандық мәслихаттағы «Amanat» партиясы депутаттық фрак­циясының мүшесі Гүлжайна Айтжанова төрағалық етті. Отырысқа аудандық мәс­­­­ли­хаттағы «Amanat» партиясы де­пу­таттық фракциясының жетекшісі, пар­тияның аудандық филиалының атқа­ру­шы хатшысы Қаншагүл Мұстафаева қатысты.

Жиында жетекші партия жоба­сын­дағы ерекше басымдық берілген Жол картасының орындалу жайы, жұмыс­сыз­дық деңгейін төмендету бағытындағы атқарылған жұмыстар және кәсіпкерлікке грант берудегі жаңа өзгерістер мен өзге де атқарылған жұмыстар жайында тиісті сала басшылары есеп берді.

Күн тәртібіндегі бірінші мәселе бойын­ша Жалағаш аудандық жұмыспен қамту, әлеуметтік бағдарламалар және аза­мат­тардың хал актілерін тіркеу бөлімінің басшысы Қанат Бөлембаев аудандағы жұмыссыздық деңгейінің көрсеткіштерін тілге тиек қылып, шешімін тапқан жұ­мыстарға да тоқтала кетті.

Оның айтуынша, өткен жылы 1342 жаңа жұмыс орнын ашу жоспар­лан­са, биыл ол 27 жаңа жұмыс орнына артқан. 2021 жылдың 3 айында барлығы 741 жаңа жұмыс орны ашылса, оның 181-і тұрақты жұмыс көзіне айналған.

2022 жылы 20 сәуірдегі мәлімет бойынша 550 жаңа жұмыс орны құ­ры­лып, оның 300-і тұрақты жұмыс ор­нына айналып отыр.

– Cтатистика мәліметінше, аудан бойынша, жұмыс күшінің саны 14947 адамды құраса, оның 14 192-сі жұмыспен қамтылғандар, 9 372-сі жалдамалы қыз­метшілер, 4 820-сы өз бетінше жұмыспен қамтылғандар. Жұмыссыздар саны 755-ті құрайды, – деді ол.

Бөлім басшысы өз сөзінде табыс көзін жасырып, әлеуметтік көмекке қол созғысы келетін тұрғындардың да бар екенін айта кетті. Өзінің кіріс көзін жасырып, оңай олжа тапқысы келетіндердің дені әл-ауқаты әлдеқайда жоғары жандар екенін ескерсек, адами тұрғыда бұл құптарлық дүние емес. Мәселені жан-жақты зерделеп, оған тосқауыл қою керектігін айтқан партия белсенділері баяндамада айтылған өзге де мәселелер төңірегіндегі сауалдарын жолдап, бөлім басшысына бірқатар ұсынысын жеткізді.

Мұнан соң Жалағаш аудандық ха­лықты жұмыспен қамту орталығы ди­­рек­торының уақытша міндетін ат­қа­­рушы Гүлнұр Мақсұтованың мемле­кеттік бағдарламалар шеңберінде бері­ле­тін грант­тар бойынша жасалған жұмыс­та­ры­ның есебі тыңдалды. Оның айтуынша, Нәтижелі жұмыспен қамтуды және жаппай кәсіпкерлікті да­мытудың 2017-2021 жылдарға арналған «Еңбек» бағдарламасының екінші ба­ғыты аясында 2021 жылы «Бастау-биз­нес» жобасымен 120 адамды оқыту жос­парланған. Бүгінде оның 159-ы онлайн оқытуға жолданып, 153-і оқуды аяқтап, 119-ы қаржылай қолдау тапқан.

– 2021 жылы Жаңа бизнес-идея­ларды іске асыру үшін 155 адамға 583 мың теңгеден мемлекеттік грант бе­ру жоспарланған. Республикалық бюд­­­­жеттен 90,4 млн теңге қаржы қара­лып, 2021 жылы 31 желтоқсанға дейін 155 адамның жобасы 90,4 млн теңгеге қар­­жыландырылды. Қазақстан Респуб­ли­касы Үкіметінің 2021 жылғы 12 қазан­дағы №728 қаулысымен «2021-2025 жылдарға арналған кәсіпкерлікті дамыту жөніндегі ұлттық жобасы» бекітілді. 2022 жылдың ақпан айынан бастап қолданыстағы заң­­дылықтарымызға өзгерістер мен то­лық­тырулар енгізіліп, жаңа бизнес-идея­ларды іске асыруға арналған гранттар 29 жасқа дейінгі жастарға, аз қамтылған отбасы мүшелеріне жататын атаулы әлеу­меттік көмек алушыларға, көпба­ла­лы отбасы есебінде жәрдемақы алу­шыларға, қоныс аударушыларға, қан­дастарға, мүгедек баланы (мүгедек ба­­лаларды) тәрбиелеушіге берілетін жәр­де­мақыны алатындарға, мүмкіндігі шек­теулі жандарға берілетін болды, – деді аталған саланың жауапты өкілі.

Қалай десек те, қайтарымсыз несие өзінің мұқтаж деген адамына жетіп, со­ның игілігіне пайдалану жайы қатаң қа­да­ғалануы керек. «Судың да сұрауы бар» дегендей, енді грант жеңілдігін алу­шылардың арасында тек жоғарыда көр­сеткен ережеге сай келетін азаматтар болуы «Amanat» партиясының тара­пы­нан да зерттелетін болады. Қоғам бел­сенділері бірауыздан осындай шешім қабылдады.

Иә, қоғамда мәселе көп. Алайда ең күрделі деген түйткілдердің түйінін ше­шуге алдағы уақытта жетекші партия өкіл­дері белсенді атсалысатын болады.