Қазақ даласында азаттық үшін талай көтеріліс, шапқыншылықтардың болғанына тарих куә. Сол нәубетті бастан кешіп, қазақ даласының ұлтарақтай жерін, қасиетті топырағын жау табанына бастырмай, қорғап қалған ата-бабамыздың ерлігі – бүгінгі ұрпаққа үлгі. Ал осыншама қиындықты еңсере білген еліміздің еңсесін тіктеген асқақ рухы – өзгеге өнеге. Тарихтың таразысында тең түскен қазақтың қанымен бірге жаралған осы бір өр намыс пен ұлттық рух күні бүгінге дейін талай тұғырдан көрінуімізде, белестердің сан саласын бағындыруда тегімізді айқындап тұрды. Өйткені қазақ – қашаннан еркіндік үшін жаралған халық.

Біз қыран бүркітті көк туымызда бейнеледік. Мұндағы қыран анығында өз иелігіндегі ұланғайыр атырапты шолып жүрген қазақтың өзі еді. Аспан түстес көк туда қанатын алаңсыз кеңге жайған бүркіттің қырағылығы да, туралығы да, өжеттігі де бізде бар қасиет. Кешегі аламан бәйгелерде топ жарып, адуынды жау әскерінің сағын сындырған атышулы қазақ батырларының бүгінгі жалғасы – Қазақстан полициясы қаңтар оқиғасында қырағылық таныта білді. Ұлтқа деген адалдық, өр намыс көптің көкейінде сарнап тұрғанымен, ел ішінде алауыздық тудыруға бір ғана әлсіздің күші жетеді. Сол себептен де «Жақсылықтың қадамы ұзақ, барар жері алыс, арамдықтың қадамы қысқа, барар жері жоқ» деп айтылады. Жаңа жылдың алғашқы айында төңкеріс жасаған алабөтен ойлылар ақылы тоқтап, санасы толықпаған, әлі оңды-солын танып үлгермеген жастардың санасына сынық сәуле ұялатып, өз елінің болашағына күмәнмен қарайтындай күйге жеткізді. Сондай шолақ ойдың жетегіне ерген кей­біреулер лаңкестердің сойылын соғып, қазақтың қалқандарына қарсы шықты.

Барға қанағат тұтпасаң, басыңдағы бағыңды ұшырасың. Иә, бұлай деуіміз тегін емес. Осыған дейін мамыражай күн кешкен қазақ жұртының басына қаңтар оқиғасы тағы бір сынақ болды. Отыз жыл бойы айтып келген азаттықтың қа­дірін бір-ақ күнде түсінгендейміз. Басы­мызға қонған бағымызды ұшырып ала жаздадық. Тәуелсіздігіміздің тұғырын құ­латып алуға шақ қалдық. Ел ішіне кіріп, арандатушылыққа бой алдырған бүлік­шілерге еріп, өзімізге өзіміз қарсы шықтық. Кешегі бейбіт шеруде талап-тілегін желеу еткен топ ақырында алаңға не үшін шыққанын ұмытты.

Ал Ел Президенті Қасым-Жомарт Тоқаев кешегі «Жаңа Қазақстан: жаңару мен жаңғыру жолы» атты саяси құжатында жыл басында орын алған қаңтар оқиғасы тәуелсіздік атты ұғымның қаншалықты қымбат екенін ұғындырғанын да жасыр­мады. Бұл жолда қаншама жазықсыз жанның өмірі қиылды, қанша қайғылы жағдайларға тап болдық, қиындықтарды бастан кештік. Осы егемендік дегеніміз жәй ғана жалаң ұран мен жалынды сөз емес екенін қадап айтқан Қасым-Жомарт Кемелұлы оның қымбат құндылық екенін тағы бір тарқатты.

Біле білсек, расымен де біз кешегі лаң­кестік әрекеттің салдарынан қолымызда барымыздан, барлық құнды­лық­та­ры­мыз­дан, тәуелсіздігімізден айы­рылып қала жаз­дадық. Құқық қорғау, ішкі істер сала­сының талай майталманы көз жұмды. Бірақ бір анығы, халық қорғандары елмен бірге, қашанда қоғамның тыныштығын тал­май күзетуге дайын тұрды.

Кешегі қаңтар оқиғасынан кейінгі жаңа леп болған бұл Жолдау қазақстандықтардың келешекке деген сенімін одан әрі нығайтып, билік пен халықты жақындастыра түсті. Әсіресе әрбір тараудағы көтерілген мәселе, айтылған ұсыныстар егемен еліміздің өр­кендеуі жолындағы игі бастамалар екені даусыз. Сонымен бірге Мемлекет басшысы қаңтар оқиғасынан кейін ел тұтастығы мен тұрақтылығының басты приоритет екені айқындалғанын және осы жайт қайта­ланбауы үшін барын салатынын айтты. Әрқашан да елмен бірге болып, қиындықты бірге еңсеруге уәде беруі де көңілімізге жылу ұялатты. Біз де бұл жолда аянып қалмай, еліміздің өсіп-өркендеуі жолында бар күш-жігерімізді біріктіріп, болашаққа зор үмітпен қарауға тиіспіз.