Кейде қыз-келіншектердің бизнестегі табысы ер-азаматтардан әлдеқайда көп болып жатады. Кәсіпкерлік саласында тірлік етіп, жұртқа үлгі болып жүрген нәзік жандар баршылық. Соның бірі – аудан тұрғыны Айгерім Гаюпова.

Әңгіме арқауына айналған кәсіп иесі 5 бала тәрбиелеп отырған ардақты ана. Ол 40 жылға жуық педагог болып, бала тәрбиесімен айналысқан ұстаз. Зейнеткерлікке шыққаннан кейін кондитерлік кәсіпті қолға алады.

Алғашқы құрал-жабдықты аудан­дағы танысынан алады. Ол танысы ке­зінде өзі кәсіп ашқысы келіп, 3 млн теңгеге жабдықтар алған, алайда істі бас­­­тамаған. Сонымен, Айгерімге заттарын сатып алуға ұсыныс тастайды. «Даму» Қоры арқылы 3 млн теңге несие алып, аталған құралдарды сатып алған Айгерім, кәсібін бастап та кетеді. Нау­байхананың ғимараты ретінде аула­сындағы қосалқы үйді пайдаланады. Әрі сол қосалқы үйдің бір бөлігінен пісірген өнімдерін сататын дүкен де ашып қояды.

«Кәсіби кондитер болмағаннан кейін бастапқыда көптеген қиындықтар болды. Үйдегі нан пісірумен тұтынушыға ұсынылатын өнім салыстыруға келмейді екен. Әдепкіде шығарған өнімдеріміз дұрыс болмай, шығын болып, түнімен ұйықтай алмай, уайымдаған кездерім болды. Үйрену үшін облыс орталығынан мамандарды шақыртып, біліктілігімізді жетілдірдік. Қиындықтың барлығы артта қалды», – дейді кәсіпкер.

Бүгінде кәсіпкер Жалағаштағы 5 мек­теп пен 3 балабақшаны, сондай-ақ, шағын дүкендерді нан өнімдерімен қамтамасыз етіп отыр. Мұнан өзге, аудан тұрғындары той, өзге де шаралар өткізу барысында кондитерлік өнімдердің түр-түріне тапсырыс береді екен. Айгерім Гаюпо­ва жетекшілік ететін «Тәтті» наубайханасынан күніне 500 данаға жуық бөлке нан әзірленіп, кондитерлік өнімдердің 20-дан астам түрлері әрқайсысы 200 данадан халыққа ұсынылады.

Кәсіпкерлер палатасы кеңес­шілері­нен мемлекеттік бағдарлама аясын­да сырттан маман шақыртуға болатын­дығын естігеннен кейін, кондитер маманын сұратып, өтінім береді.

Кәсіпкерлер палатасы А.Гаюпованың сұ­ранысын ескере келе, «Бизнестің жол картасы - 2020» мемлекеттік бағ­дар­­­­­­ламасының «Аға сеньорлар» құ­ры­лымы аясында Түркиядан Маджит Горпюз есімді маманды алдыртты. Түрік сарапшысының наубайхана са­­­­­ла­­­­­­сындағы тәжірибесі 20 жылдан асады. Наубайхана және кондитерлік істе жан-жақтылығымен көзге түскен, аса бі­­­­лікті мамандар қатарында. Шетелдік ма­­­­ман енді Айгерімді екі апта көлемінде саланың қыр-сырымен таныстыратын болады.

«Кәсіпкерлер палатасының шақыр­туымен Туркиядан келген Маджит маман біз үшін үлкен қолдау болып отыр. Өнімдерді әзірлеудің оңтайлы жақтарын көрсетіп беріп жатыр. Кремдерді жасау тәсілдерін, бисквитті сәтті шығаруды, торттың түрлерін жасауды үйретуде. Байқағаным, біз көп шығыс жасайды екенбіз. Маджит бізге бар шикізаттан қалдықсыз өнім шығаруды, тіпті, үнем­деуге дейін көрсетуде. Менде жұмыс жасайтын қыздарға әр күнде қамырды түрліше илеу тәсілдеріне дейін үйре­туде», – дейді кәсіпкер.

Айгерім Гаюпова биыл кәсібін ке­ңей­ту үшін «Ауыл шаруашылығын қар­жы­лай қолдау қоры» АҚ облыстық филиалынан 4 млн теңге көлемінде несие алды. Алған қаржыға талапқа сай наубайхана салып, бүгінде 4 адамды жұмыспен қамтамасыз етіп отыр. Бұл – ұмтылған адамның табысқа жететінінің тағы бір айғағы.