"Ел іші – өнер кеніші". Мәдениет пен өнер саласы жыл өткен сайын дамып келеді. Бұған ел-жұрт ауылда туып, үлкен сахналарға жарқырап шыққан жас өнерпаздарды көргенде көз жеткізіп келеді. Өнер – қай жерде­ де өнер. Өнердің тілі ортақ. Ұлтқа, нәсілге бөлінбейді және сол секілді шын өнерпазға ауыл клубы мен үлкен сахнаның да айырмашылығы жоқ...

Жаңадария ауылдық мәдениет үйі жанынан құрылған "Әзілизация" әзіл-сықақ отауы бірнеше жылдардан бері өздерінің қалжың-қоржынындағы қойылымдары арқылы көрерменнің көңілін күлкімен көмкеріп келеді. Жаңадария ауылдық клубының басшысы Р.Көшеров жетекшілік ететін "Әзілизацияның" әзілдері астарлы, күлдіре оты­­рып көрерменге ой салады, қоғамдағы кейбір келең­сіздіктерді келемеждеп, сын тезіне алады. Ауылдан шыққан "Әзілизацияның" өнер жолында жеткен жетістіктері көп. Мәселен соңғы бес айдың ішінде: Қазалы ауданында өткен республикалық "Арт.Қазақстан" жобасында "Актерлік шеберлік" жанры бойынша бас жүлде иеленсе, Қызылорда қаласындағы "Мереке-думан" әзіл-сықақ отауының 30 жылдығына арналған республикалық өнер фестивалінің Дипломанты атанды. Сонымен бірге "Бейбітшілік әлемі" Халықаралық Қазақ Творчестволық Бірлестігі Қазақстан Республикасы Президенті Нұрсұлтан Назарбаевтың "Болашаққа бағдар: рухани жаңғыру" бағдарламасы бойынша ұйым­­­­­­­дастырған өнер фестивалінде "Актерлік шеберлік" жанры бойынша Бас жүлде иеленген.

Аталған әзіл-сықақ отауы жуырда ғана Арал ауданында өткен Қазақ сатирасына елеулі үлес қосқан, "Тамашаның" тарланы, таланатты актер Қ.Сұлтанбаевтың шығармашылық өнер жолын насихаттауға арналған "Күлкі-думан" атты әзіл-сықақ отауларының облыстық байқауында жүлделі ІІ орынды иеленіп, аудан мәдениетінің мәртебесін биіктетті. Қызылорда қаласынан және барлық аудандардан 9 өнер ұжымы қатысқан байқауда бағы жанған "Әзілизацияның" өнерін қазылар да жоғары бағалап, көрермен де зор қошемет көрсетті.