Мамырдың 25-ші жұлдызында еліміздегі барлық мектепте соңғы қоңырау соғылды. Бұл күн білім ұясынан қанат қаққалы тұрған түлектер үшін ерекше.

Мектеп бітірушілердің өміріндегі ең маңызды сәт – «Соңғы қоңырау» салтанаты. Аудан бойынша биыл 287 жас түлек алтын ұя мектебімен қоштасып, үлкен өмірге қадам жасамақ. Аудан әкімінің орынбасары Жағыпар Тажмаханов №123 мектеп-лицейінде өткен соңғы қоңырау жиынына қатысып, жас түлектерге ақ жол тіледі.

– Ауданда болашақтың тірегі – жастардың толыққанды білім алуына барлық жағдай жасалған. Білім беру сапасы жылдан-жылға артып келеді. Ұлттық бірыңғай тестілеу қорытындысымен 87,5 балды құрап, ауданымыз былтырғы жылы облыс бойынша аудандар арасында бірінші орынды иеленді. Өткен жылы мектеп бітірген 344 бітірушінің 334-і (97 пайызы) жоғары және арнаулы орта оқу орындарына түсті. Сонымен қатар талапкерлер Ресей мемлекетінің маң­дай алды ЖОО-на білім алуда. Осының барлығы да сіз­­дердің келешекте бәсекеге қабілетті білікті маман болып қалыптасуларыңыз үшін жасалып жатқан шаралар. Алдағы сын сағаттан сүрінбей өтіп, армандаған мамандықтарыңыздың иесі атануларыңызға тілектеспін, – деді аудан әкімінің орынбасары.

Т.Жүргенов атындағы №123 мектеп-лицейін биыл 35 оқушы бітірді. Осы оқу жылында мектеп-лицей мұғалімдері облыстық, республикалық кәсіби байқаулардан 23 жүлделі орын алса, оқушылары түрлі деңгейдегі байқаулар, пәндік олимпиадалар, ғылыми жобалардың облыстық, рес­публи­калық кезеңінен 39 жүлделі орын иеленген.

Осы ретте аудандық білім саласы ардагерлер кеңесінің төрағасы Әбілқайыр Ерәлиевті сөзге тартқан едік. Ардагер-ұстаз соңғы қоңырау әр шәкірттің жүрегінде сақталатын айрықша шара екенін атап өтті. Сондай-ақ биыл соңғы қоңырауға аудандағы мектептер жоғары деңгейде дайындалғанын жеткізді. Бұған өзі қатысқан №123, №202 мектептердегі салтанатты шаралар дәлел бола алатынын айтты

Айта кетейік, өңірде биыл 20 мектептен 227 мектеп бітіруші түлек ҰБТ-ға қатысады. Олардың 22-і «Алтын белгіге», 20-ы үздік аттестатқа үміткер екен.