» » Еуропа лигасы: «Вест Хэм» 46 жылдан кейін жартылай финалға шықты

Еуропа лигасы: «Вест Хэм» 46 жылдан кейін жартылай финалға шықты

Еуропа лигасының ақтық мәресіне өтетін командаларды анықтайтын ойынның да басталуына аз ғана күндер қалды. Әйгілі «Камп Ноу» стадионында Еуропа лигасының 1/4 финалындағы жауапты ойында каталондық «Барселона» франкфурттық «Айнтрахтты» қабылдады. Тартысқа толы кездесуде 2:3 есебімен франкфурттық клуб жартылай финалға өткен болатын.

Есеп бірінші таймның басында-ақ ашылды. 4 ми­нутта германиялық клубтың жартылай қор­ғау­шы­сы Филип Костич 11 метрлік айып добын сәтті орындады. 37 минутта шабуылшы Ра­фаэль Борре есепті еселеп, бірінші тайм қо­нақ­­тардың айқын басымдылығымен аяқталды. Екінші тайм Барселона үшін шешуші кезең бо­латын, сол себепті Хави ш­ә­кірттері допты то­лықтай өз бақы­лауына алды. 67 ми­нутта қарымта шабуылды тиімді пайдаланған франкфурттық жартылай қор­­ғаушы Кос­тич Тер Штеген қорғаған қақпадан тағы бір мәрте саңылау тауып, дубль жасады. Ал алаң қо­жайындары сапынан екінші таймның қосымша уақытында жартылай қор­ғаушы Серхио Бускетс мергендік танытты. 10 минуттан кейін «Айнтрахт» қақпасына бел­гі­ленген 11 метрлік айып добын Мемфис Депай голға ай­нал­дырды.

Еске салайық, екі команда арасындағы ал­ғашқы ойын 1:1 есебімен аяқталған болатын. Қос кездесудің қорытындысы бойынша франк­фурттық «Айнтрахт» жартылай финалға жолдама алды.

Лион қаласындағы «Групама» стадионында «Лион» мен «Вест Хэм» арасындағы жауапты ойында 0:3 есебімен англиялық клуб келесі кезеңге өтті. Кездесудің бірінші минутынан бастап Дэвид Мойес шәкірттерінің шеберлігі байқалды. 38 минутта «Вест Хэм» қорғаушысы Крейг Доусон лиондық қақпашыдан айласын асы­рып, бас­пен гол соқты. 4 минуттан кейін Деклан Райс алыс­тан тамаша соққы жасап, коман­дасының есеп­тегі басымдығын екі голға жет­кізді. Ойынның 48 минутында шабуылшы Джаррод Боуэн алаң ие­лерінің қақпасына үшінші голды соқты.
Осылайша, «Вест Хэм» 48 жылдан кейін қос кез­десудің қорытындысы бойынша Еуропа ли­га­сының жартылай финалына шықты.
Бергамодағы «Джевисс» стадионында «Ата­ланта» германиялық клуб «РБ Лейпцигті» қа­был­дады. Жауапты кездесуде Доминико Те­деско шә­кірттері 0:2 есебімен жеңіске жетті. Ойын ә дегеннен тартысты бас­­талды, допты ие­лік етуде қос клуб та қалыс қал­мады, бірақ так­­тикалық дайындыққа келсек, германиялық клуб­тың басымдығы байқалды. Кезекті қауіпті шабуылдардың бірінде «РБ Лейпцигтің» жар­тылай қорғаушысы Кристофер Нкунку 18 ми­нутта есеп ашты. Ал 87 минутта Нкунку 11 метрлік айып соққысын өз пайдасына жаратып, қос голдың авторы атанды. Екі ойынның қорытындысы бо­йын­ша 3:1 есебімен басым түскен германиялық клуб жартылай финалда өнер көрсететін болады.

Глазгодағы «Айброкс» стадионында «Рейнд­жерс» пен «Брага» арасындағы кездесу де тартысқа толы болды. Экстра-таймға ұласқан ойында шотландиялық клуб 3:1 есебін жартылай финалға бе­рілетін соңғы жолдамаға иелік етті.

Осы аптада англиялық «Вест Хэм» гер­ма­ниялық «Айнтрахтпен» ақтық мәренің жол­да­масын сарапқа салса, «РБ Лейпциг», шот­лан­дия­лық «Рейнджерспен» қос ойын өткізеді. Алғашқы ойындар 27-28 сәуірде, ал жауапты кездесулер 4-5 ма­мырда өтеді. Осылайша, футбол жан­күйерлерінің кө­кейіндегі «Еуропаның кубогын кім иеленеді?» деген сұрақтың жауабы одан әрі шиеленіскен се­кілді, алдағы уақытта тартысты футбол кеш­терінің куәсі болатынымыз анық.

Жандос Жазкен


26 сәуір 2022 ж. 376 0