Апта басында аудандық мәслихаттың кезектен тыс 47-сессиясы өтті. Сессияға аудан әкімінің орынбасары Рүстем Ержанов және мәслихат депутаттары қатысты. Келелі жиында бюджет мәселесі мен ауданның даму бағдарламасы қаралды.

Күн тәртібіндегі екі мәселе бойынша аудандық экономика және бюджеттік жоспарлау бөлімі басшысының орын­басары Қуанышкүл Көшербаева хабар­лама жасады.

– 2019 жылға Жалағаш кентінің және ауылдық округтердің бюджеттері 1337,8 млн. теңге көлемінде бекітілді. Жыл көлемінде дербес бюджетке 3 рет нақтылау, 3 рет түзету енгізіліп, нәтижесінде нақтыланған дербес бюджет көлемі 1773,6 млн. теңгеге артты. Жыл көлемінде дербес бюджетке 387,2 млн. теңге ағымдағы нысаналы трансферттер бөлінді, – деді.

Күн тәртібінде қаралған екінші мәселе ауданның 2016-2020 жылдарға арналған даму бағдар­ламасы болды. Экономика және бюджеттік жоспарлау бөлімі басшысының орын­басары енгізілген өзгеріс­тер мен толықтырулар туралы айтты. Оның сөзінше, облыстық эконо­мика және бюджеттiк жоспарлау басқармасы басшысының 2019 жылғы 20 наурыздағы бұйрығымен Қызыл­орда облысының аудандары мен Қызыл­орда қаласының жергiлiктi атқа­рушы органдары үшiн нысаналы индика­торлар тiзбесi бекiтiлген және осы бұй­рықпен қолданыстағы аудан­ның даму бағдарламасында бекітілген 78 нысаналы индикатордан 55 ныса­налы индикатор қысқартылып, 23 ныса­налы индикатор қолданыста қалуы қа­рас­­тырылған, сондықтан ауданның 2016-2020 жылдарға арналған даму бағ­дарламасына өзгерістер енгізу жос­парланған. Ауданның 2016-2020 жыл­дарға арналған даму бағдар­ла­ма­сындағы 23 нысаналы индика­тор облыс­тық салалық басқар­ма­лармен то­лық келісіліп, 23 нысаналы инди­ка­тордың 2019 жылға 9 нысаналы инди­катор­дың жоспарлы мәндеріне өзгеріс енгізілгенін жеткізді.

Мәслихат депутаттары күн тәрті­бінде қаралған мәселелерге бай­ланысты бірқатар ұсыныстарын біл­діріп, сауалдарына жауап алған соң, бірауыздан қолдап, бекітті. Сессия оты­рысын аудан әкімінің орынбасары Рүстем Ержанов қорытындылап, аталған мәселелерге қатысты жұмыстарды бір саралап өтті.