Ауылшаруашылығы саласының көрнекті ұйымдастырушысы, Ұлы Отан соғысының ардагері, қоғам қайраткері Мөрәлі Шәменов атындағы дзюдо күресінен жасөспірімдер арасында республикалық турнир өтті.

Спорттық шараны аудан әкімінің орынбасары Жағыпар Тажмаханов ашып, туған жердің көркеюіне, ауыл шаруашылығының өркендеуіне са­на­лы ғұмырын сарп еткен, болмысы ерен тұлға туралы айта келе, дәстүрлі түрде жыл сайын өткізілетін турнирдің барлық қатысушыларына сәттілік тіледі. Палуандар арасындағы тартысты бәсекеде Ж.Тажмаханов ау­данда спорт саласын дамыту бір жолға қойыл­ғанын айтып, соғыс және еңбек ардагері Мөрәлі Шәменовті еске алуға арналған турнир де жас спорт­шылардың қабілетін шыңдауға үлкен мүмкіндік екенін жеткізді.

Мұнан соң қоғам қайраткері Мөрәлі Шәменовтің баласы Өмірбек Шәменов, аудандық ардагерлер кеңесінің төра­ғасы Садық Әлиев, сонымен қатар, Қазақстан Республикасының Дзю­до күресінен халықаралық дәре­жедегі жат­тықтырушысы Рашид Бурлов сөз сөйледі.

– Мөрәлі Шәменұлы – өзінің үл­гілі ісімен елге елеулі еңбек етіп, аты аңызға айналған, беделі биік ірі тұлға, заманының іскер басшысы, ауыл шаруашылығының көрнекті ұйымдастырушысы. Оның өмірі мен еңбек жолы – кейінгі ұрпаққа үлгі-өнеге. Танымал тұлға өткен ға­сырдың алпысыншы-жетпісінші жыл­дары ауданның әлеуметтік-эко­но­ми­калық дамуына мол үлес қос­қан азамат. Соғыстан күйзелген шаруа­шылықтардың ішінде артта қал­ған Молотов атындағы колхоздың аз уақытта алға суырылып шығып, кейін «Коммунизм» совхозының бүкіл республикаға белгілі болуы, бұл сөз жоқ, іскер басшы, туған жерін шын жүрегімен сүйетін азамат аға Мөрәлі Шәменовтің ең­бегі. Өткенді білмей, болашақты баянды ету мүмкін емес. Саналы ғұ­мырын мемлекетіміздің өр­кен­деуіне, туған жеріміздің көркеюіне арнаған тұлғаларды өскелең ұрпақ білуі қажет, – деді Садық Әлиев.

Айта кетейік, танымал тұлға атын­дағы турнир 1994 жылы облыстық деңгейде бастау алған еді. Кейін 2007 жылдан бастап, ауқымы кеңейген ша­раны республикалық деңгейде өт­кізу қолға алынды. Аталған сайыста та­лабын шыңдаған бірқатар жастар бүгінде тартысты бәсекелерде елі­міздің, облыстың аудан абыройын асқақтатуда. Ал бұл жолғы байрақты бәсекеде Алматы, Ақтөбе, Батыс Қазақстан, Шығыс Қазақстан, Түркістан, Қызылорда облыстарынан және Қызылорда қаласы, Қармақшы, Жалағаш аудандарынан келген ко­мандалардың 300-ге жуық спорт­шысы 9 салмақ дәрежесінде та­тами үстінде тайталасқа түсті.

Екі күнге созылған спорт додасында кіл мықтылар арасынан суырылып шыққан спортшылар қаржылай сыйлықтарға ие болып, арнайы медальдармен марапатталды.