АТПАЛ АЗАМАТТЫҢ САНАЛЫ ҒҰМЫРЫ – ЖАСТАРҒА ӨНЕГЕ

 Еңбек адамын құрметтеп, насихаттау мақсатында аудандық мәдениет және өнерді дамыту орталығында Елбасы Н.Ә.Назарбаевтың «Болашаққа бағдар:рухани жаңғыру» бағдарламалық мақаласы аясында «Тұлғатану» жобасы қолға алынған болатын. Аталған жоба аясында орталықтың ұйымдастыруымен «Еңбегі елге еленген» атты ауыл шаруашылығы өндірісінің білгір жетекшісі, ІІ дәрежелі «Еңбек Даңқы» белгісінің, «Құрмет» орденінің иегері, ауданымыздың «Құрметті азаматы» Сапарбек Ақмырзаұлы Мыхановпен кездесу өтті.

Шара барысында атпал азамат басшылық ететін «Байтабын» шаруа қожалығының бүгінгі күнге дейінгі жеткен жетістігі мен Бұқарбай батыр ауылына жасаған қолғабысы, ауылдың әлеуметтік-мәдени жағдайы туралы бейне-ролик көрсетілді.Тағылымды шараны белгілі айтыскер ақын Мамыр Байдәулетов жүргізіп, Сапар ағамызбен сұхбттасты.
Сапар Мыханов жастайынан ауыл шаруашылығы саласында қажырлы еңбек етіп, кешегі тоқырау заманда шаруашылықты сақтап қалудың жолын іздеп, бүгінгі күнге дейінгі жеткен жетістігі мен қиын-қыстау кездегі жұмыстарын тілге тиек етті. Қазіргі таңда туған жерге жасап жатқан еңбегі мен қамқорлығын айтып, жастарды ауылға келіп еңбек етуге, сапалы білім алуға шақырды. Шараны орталық директоры Ғани Сүлейменов қорытындылап, бүгінгі кеш қонағы Сапар Ақмырзаұлына шапан жауып, ізгі лебізін білдірді.