Жалағашта кент орталығындағы көшелердің құрылыс сапасын арттыру жолында атқарылған жұмыстар бүгінде өз жемісін беріп жатыр. Негізінен ауданда жалпы ұзындығы 223,3 км құрайтын автомобиль жолдары болса, Оның 50 км-сы республикалық, 60,6 км-сы облыстық және 112,7 км-сы аудандық маңызы бар жолдар болып табылады. Бүгінде аудандық маңыздағы 111,7 км жолға асфальт төселген. Былтыр аудандық маңызы бар автомобиль жолдарының жақсы және қанағаттанарлық жағдайы 78,4 пайызды құраса, биыл бұл көрсеткіш 90 пайызға жуықтап отыр.

Жалағашта жалпы ұзындығы 206,5 шақырымды құрайтын 202 көше бар. Былтыр жол сапасын арттыруда игі шаралар қолға алынып, көшелердің құрылыс жұмыстары қарқын алды. Бұл бағытта қолға алынған жобаларға өткен жылдың өзінде 1 млрд 417,008 млн теңге бөлініп, жалпы ұзындығы 30 шақырымды құрайтын жолдар мен көшелер жөндеуден өтті. Ал биыл 1 млрд 407,702 млн теңгеге ұзындығы 33 шақырымды құрайтын басқа да жолдар мен көшелердің мәселесін шешу қолға алынды. Тиісті қаражатқа 1 көпірдің реконструкциялау жұ­мы­сын аяқтау да жоспарда бар. Қазіргі таңда тиісті қа­ражаттың 1 млрд 364,916 млн теңгесі игері­ліп отыр.

Шыны керек, бүгінде Жала­ғашта жол құрылысының қарқын алу­ына мемлекеттік бағдарламалар үлкен көмек болып отыр. Мәселен, биыл «Нұрлы жол» бағдарламасы шең­бе­рінде 646,202 млн теңгеге 17,85 шақырымды құрайтын жол жөндеу жұ­мыстары мен 3 көпірді күрделі жөн­деу және 1 көпірді реконструк­ция­лау жұмысын аяқтау қолға алынды. Тиіс­ті қаржының 521,539 млн теңгесі ел тайқазанынан қаралса, облыс қазы­на­сынан 124,663 млн теңге бөлінді. Бұл қаражатпен ауданда жол сапасын арт­тыру мақсатында 5 жобаны жүзеге асыру жоспарланып отыр.

«Жұмыспен қамтудың жол кар­тасы» бағдарламасы бойынша жал­пы құны 755,5 млн теңгені құрай­тын 8 жоба жүзеге асып, 15,05 ша­қы­рым жол жөндеуден өтті. Жол құ­ры­лысының арқасында жергілікті 183 адам жұмыспен қамтылды. Қазіргі таңда аудандық маңызы бар 112,7 шақырымды құрайтын автомобиль жолдарын ағымдағы жөндеуге және күтіп ұстауға 6 млн теңге бөлінді.

Расында соңғы 2-3 жылда Жа­ла­ғашта жол құрылысының қарқын ал­ғанын жергілікті халық жақсы біледі. Десе де бұл осымен ауданда жол сапасы түбегейлі жақсарды дегенді білдірмейді. Сондықтан ел ағалары алдағы жылы да кезекті басқа да көшелердің сапасына қатысты күрмеулі мәселелерді шешуді жоспарлап отыр. Келер жылы Жалағашта «Нұрлы жол» бағдарламасы аясында 4 жобаға облыстық бюджеттен 692,023 млн теңге қаржы бөлу жоспарланған болатын. Оның ішінде Жалағаш ауданындағы облыстық маңызы бар «Жалағаш-Жосалы» автомобиль жолының 27 шақырымын орташа жөндеуге 167,584 млн теңге бөлінсе, Қызылорда облысының «Қы­зыл­орда-Жалағаш-Самара-Шым­кент» автомобиль жолын­дағы апатты жағдайдағы көпірлерді күрделі жөн­деуге 240,526 млн теңге қаралып отыр. Сондай-ақ Жалағаштағы ау­дандық маңызы бар «Самара-Шым­кент-Мәдениет-Т.Жүргенов-Жаңаталап-Аққыр» ав­то­­мобиль жо­лының 9,4 шақырымын ор­­таша жөн­деуге 141,563 млн теңге бө­лі­неді деп күтілуде. Ал аудандық ма­ңыздағы «Самара-Шымкент-Еңбек-Есет батыр-Жаңадария» автомобиль жолын орташа жөндеуден өткізуге 142,350 млн теңге қаржы қаралды. Аудан орталығынан бөлек ауылдық елді мекендердің жол мәселесінің шешімін табуы жергілікті халықтың көз қуанышына айналып отыр. Әсі­ресе күре жолдың бойындағы Еңбек ауылы мен үлкен жолға дейінгі көшенің құрылыс сапасы тек ақ­қошқарлықтарды ғана емес, көр­шілес Есет батыр мен Жаңа­дария ауылы халқын да алаң­датып қойған еді. Бүгінде бұл мәселе өз шешімін тапса, енді Есет батыр мен Еңбектің арасындағы тас жол, Жаңа­дариядан Аламесекке дейінгі жолдың сапасына мән беріледі.