АУДАНЫМЫЗДА МАЛ ШАРУАШЫЛЫҒЫ ӨРКЕНДЕП КЕЛЕДІ

Біздің ауданымыздың жер бедері мал шаруашылығына ыңғайлы. Қазір ауылдық жерлерде бос жатқан шабындықтар мен жайылымдық жерлер көп. Соларды тиімді пайдаланып, игеріп, малдың өрісіне айналдырып, әлеуметтік жағдайымызды жақсартуымыз керек. Сондықтан ауыл шаруашылығының дамуына серпін беретін мал шаруашылығына көңіл бөлінсе деген тілегіміз бар еді. Ол да өз кезеңімен орындалып келеді. Қазірде әсіресе, ауылдың тіршілігі жанданды. Мемлекеттік бағдарламалар бойынша көптеген аудан тұрғындары төмен пайызбен несие алып, шаруашылықтар ашып, кәсіп істеп отыр. Ауылда отырып, күнделікті ішетін сүтіңді, майыңды, айраныңды базардан сатып алу ауыл халқына сын ғой. Сол үшін тырбанып еңбек етіп жатырмыз. Оған мемлекеттің қолдауы сеп болып отыр. Мал ұстап, оның басын көбейтіп, халықты ет, сүт, май өнімдерімен қамтамасыз етемін дегендер үшін мүмкіндік көп.
     
Мәселен мен былтыр "Ауыл кредиттік серіктестігі" ЖШС-нан 1 200 бас қой сатып алу үшін 47 миллион 6 мың теңге несие алдым. Әзірге шаруашылыққа 400 бас қой алып, кәсібімізді бастадық. Қора-жаймыз дайын. Тек енді тынымсыз жұмыс істеп, мал басын көбейтуіміз керек. Бұқаралық ақпарат құралдарынан оқып, біліп отырмыз, биылғы жылы ауданымызда мүйізді ірі қара 34 471 басқа, жылқы 15 181 басқа, түйе 648 басқа, уақ малдар 49 799 басқа жетіпті. Бұл өте жақсы, жоғары көрсеткіш қой. Аудан бойынша 106 шаруашылық мал өсірумен айналысып отыр екен. Олардың көбі "Сыбаға" бағдарламасы арқылы қаржыланып, мал шаруашылығын өркендетуді қолға алған. Бұл меніңше, өте жақсы көрсеткіш. 

     Осы қарқынынан жаңылмаса, алдағы уақытта ауданымыздың әлеуметтік ахуалы артады деп сенемін. Төрт түліктің басы артқан сайын, ел ішіне береке үйіріле бастады. Ауданымызда атқарылып жатқан бұл игілікті істер тек жеке адамның күнкөрісі үшін емес, жаппай халықтың тұрмысын түзеу үшін жасалып отыр. Сондықтан бұл істе бәріміз жұмыла жүк көтеруіміз керек деп ойлаймын.
                                                                                                        

  Еркін ӘЛІБЕКОВ,
                                                                                            "Атамекен" шаруа қожалығынң төрағасы