Батыр аналар құрмет төрінде

Анаңды Меккеге үш рет арқалап аЛЫП Барсаң да перзенттік парызыңды өтей алмайсың. Бұл сөздің астарында «ана» деген асыл ЖАННЫҢ құдіреті жатқандай. Тоғыз ай құрсағында көтеріп, жарық дүниеге әкелген, түн ұйқысын төрт бөліп, ақ сүтін берген, қанаттыға қақтырмай, тұмсықтыға шоқтырмай өсірген ардақты аналарды тіршіліктің тірегі деуге болады.

Кезінде ата-бабаларымыз елді, жерді білектің күшімен, найзаның ұшымен жан беріп қорғады. Қазақ қоғамының қиын кезеңдерінде әйелдер қауымының ел үшін сіңірген еңбегі зор. Тарихтан белгілі батыр қыз-келіншектердің ерлігінің өзі көпке үлгі-өнеге. Тарихтан белгілі Бопай ханым, Тұмар ханымдардың есімі ел жадында мәңгі қалады. Одан бергі кешегі Ұлы Отан соғысында талай жаудың меселін қайтарған Әлия, Мәншүктер ерлікпен қаза тапты. Олар бізге ұланбайтақ жерді аманат етіп қалдырды. Осы жерге иелік ететін, қоғамға пайдалы азамат тәр­биелеуде аналардың рөлі зор. Әрбір отбасындағы береке, бірлік, татулық анадан бастау алады. Ал әр шаңырақта береке болатын болса, елде тыныштық орнайтыны анық. Негізі қа­зақ халқы көпбалалы отбасын ерекше құрметтеген. «Бір қозы ту­са, бір түп жусан артық шығады» деген нақыл бар емес пе! Көпбалалы болудан, оны тәрбиелеп өсіруден еш уақытта қорықпаған аналарымыз әр баланың өз несібесі боларын біліп, оларға тәлім-тәрбие беріп, бәсекеге қабілетті етіп қалыптастырып келеді. Себебі әр ба­ла жарық дүниеге өз несібесімен келеді. Мем­лекеттің дамуы жолында ертеңгі намысты ұл мен қызды тәр­биелеуде аналардың сіңірер еңбегі мол.
Ауданда өмірге ұрпақ әкеліп, оларды тәрбиелеп өсіруде үлгі-өнеге болып жүрген алтын құрсақты аналар да жеткілікті. Бүгінде мыңнан аса көпбалалы ана есепте тұрады. Олардың әрқайсы қоғамға пайдалы, саналы ұрпақ тәрбиелеуде аянбай тер төгіп келеді. Жалағаш ауданында 304 «Алтын алқа» және 592 «Күміс алқа» иегері бар. Алтын құрсақты аналардың қатары тағы да толықты. Апта соңында аудан әкімі Асылбек Шаменов ауданның көпбалалы аналарымен кездесіп, 11 анаға «Алтын алқа», «Күміс алқа» төсбелгілерін табыстады.

– Еліміздің демографиялық ахуалын жақсартуға қосқан сүбелі үлестеріңіз үшін алғыс білдіреміз. Өсіріп отырған ұл-қыздарыңыз еліміздің нағыз патриоты боларына сеніміміз мол. Баршаңызға мықты денсаулық, мызғымас береке-бірлік тілеймін. Отбасыларыңыздың ұйытқысы болып, ақ жаулықты әже атаныңыздар, – деді Асылбек Өмірбекұлы.

Айта кетейік, бүгінгі күні ауданда 52 ана І және ІІ дәрежелі «Ана даңқы» орденімен марапатталса, 46 батыр анамыз бар.

«ЖЖ» ақпарат