Алдағы міндеттер сараланды
Осы аптада «Nur Otan» партиясы Жалағаш аудандық филиалы жанындағы партиялық бақылау комиссиясы және сыбайлас жемқорлыққа қарсы іс-қимыл жөніндегі қоғамдық кеңес отырысы өтті. Жалағаш аудандық мәслихатының «Nur Otan» партиясы депутаттық фракция жетекшісі Қаншагүл Мұстафаеваның төрағалығымен өткен жиынға комиссия, кеңес мүшелері және сала басшылары қатысты.Жиынның күн тәртібіне қойылған «Nur Otan» партиясы сайлауалды бағдарламасының орындалу барысы туралы аудандық ішкі саясат бөлімінің басшысы Шарабан Қалыбаев хабарлама жасады.
Оның айтуынша, Жалағаш кентінде ашылған «Сoworking center» орталығының ықпалымен жастардың өзін-өзі тануы мен шығармашылығын дамытуға жағдай жасалып отыр. Аудандағы жастардың 37 пайызы, яғни 2 850 жас буын аталған орталықта өз білімдерін шыңдауда. Жергілікті тұрғындар арасында сыбайлас жемқорлықтың алдын алу және ескерту бойынша іс-шараларды өткізуде үкіметтік емес ұйымдардың әлеуеті жоғары.
– Кент және ауылдық округтерде қоғамдағы жат қылыққа жол бермеу тақырыбында 14 билборд ілінген. Аталған жұмыстарды жүзеге асыру үшін «Қоғамда сыбайлас жемқорлықтың көріністеріне жол бермеуді қалыптастыру көздері» әлеуметтік қызметіне 420 мың теңге қаржы қаралып, бұл жұмысты «Жалағаш – достық мекені» қоғамдық бірлестігі жүргізуде. Сондай-ақ аудан әкімінің ресми сайтына, әлеуметтік желілерде сыбайлас жемқорлыққа қарсы мақалалар, посттар тұрақты түрде жариялануда, – деді бөлім басшысы.
Ал жиында сөз алған аудандық полиция бөлімі бастығының міндетін атқарушы Мәулен Өсер аудан бойынша тұрғындардың қауіпсіздігін сақтау мақсатында 8 бейнебақылау камерасын орнату жұмыстары жүргізіліп жатқанын, полиция қызметкерлерін заманауи құрылғылармен қамтамасыз ету мақсатында тиісті орындарға ұсыныстар берілгенін жеткізді.
Мұнан соң сөз алған аудандық аурухана бас дәрігерінің орынбасары Индира Орынбасарова отбасы құндылығын сақтау мақсатында аудан орталығында отбасыларға арналған психологиялық кабинет ашу мәселесі бүгінде оң шешімін тапқанын тілге тиек етті.
– Тұрғындардың сапалы өмір сүру деңгейін жақсарту мақсатында "Ауыл – ел бесігі" жобасы аясында Таң елді мекенінде дәрігерлік емхана құрылысын салуға республикалық бюджеттен қаржы бөлінді. Ал Мырзабай ахун және Аламесек елді мекендеріне ауылдық дәрігерлік амбулатория құрылысына жоба-сметалық құжаттар әзірленуде, – деді ол.
Сондай-ақ басқосуда М.Шәменов ауылдық округі бастауыш партия ұйымының төрағасы Гүлнар Ералиева бастауыш партия ұйымының атқарған жұмысы және алдағы міндеттері туралы хабарлама жасады. Бастауыш партия ұйымының жұмысына оң баға берген Қаншагүл Шоңмұрынқызы алдағы атқарылатын жұмыстарға талдау жасап, тиісті тапсырмалар берді.
Г. АСҚАРҚЫЗЫ
