» » АҚҚҰМДАҒЫ АЛҒАШҚЫ ОРАҚ

АҚҚҰМДАҒЫ АЛҒАШҚЫ ОРАҚ

Қырман қазынаға толып, аймақтың берекесі артар мезгіл таяған сыңайлы. Күз келген бойда шаруашылықтар егінге орақ салып, Жер-ананың берген ырзық-несібесін жинап алудың қамына кірісті. Алқаптағы егіннің шығысы да жаман емес. Аграрлық өңірдің еңбеккерлері өткен жылы бұл маусымды толағай табыс­пен аяқтаған болатын. Бұйыртса, осы дәстүр биыл да жалғасын тапқалы тұр.
Осы жылы ауданда бірінші болып егінге орақ салу рәсімін «Абзал и Ж» ЖШС бастады. Былтыр ғана құрылған серіктестіктің бүгінде шаруасы ширақ. 300 гектар алқаппен жұмысын бастаған серіктестік басшысы инженерлік жүйеден шығып қалған жерлерді қалыпқа келтіруде біраз қиындықтың кездескенін айтады. Бір жағынан су келетін каналдар тым биіктеп кеткен. Соның өзінде мұндағы күрішшілер өткен маусымда гектарынан 50 центнерден өнім алды. Осындай олқылықтарды ескерген Жандарбек Төлегенов биыл жер көлемін ұлғайтып, шаруашылық жұмысын оңтайландыратын бірқатар жобаны қолға алған. Шіркейліден Қосөзек каналы арқылы су келетін 4 шақырым жерді қайта қалпына келтірді. Есесіне биыл судан тапшылық болған жоқ.
Шаруашылық басшысы биыл өзіне тиесілі 500 гектарға жуық алқаптың 400 гектарына Сырдың басты дақылын септі. Егістік тегіс күрішке тұнып тұр. Орақ салу рәсіміне жиналған абыз ақ­са­қалдар мен майталман маман­дардың да көңілі шат-шадыман. Алдымен үлкендердің батасын алған серіктестік қызметкерлері егінге орақ салу рәсімін бастап та кетті.
Серіктестіктің сыртынан қараған адам былтыр ғана құрылды деп ойла­майды. Техникаларының да 90-95 пайызы жаңа көліктер. Егін жинау нау­қанында қыруар іс тындыратын алып техникалары мен оны тізгіндеген май­талман мамандарға сенім артылып отыр.
– Былтыр осы жұмысты қолға аларда әрі қарай алып кете алам ба деген күмән болды. Бірақ тәуекелге бел буып, осы саланы ілгеретемін деген мақсатыма жетуге кірістім. Алғашқы қадамым жаман болған жоқ. Сол жетістікті биыл еселетсем деп отырмын. Алдағы мақсат – жер көлемін ұлғайтып, шаруашылықтың ауқымын кеңейту. Бүгіннің өзінде 25 адамды жұмыспен қамтып отырмыз. Ойдағы жобалар жүзеге асса, олардың да қатары артады. Қазір кәсіппен айналы­самын деген адамға да, бір салада еңбек етемін деген жанға да мемлекет тарапынан үлкен көмек бар. Біз сол қолдауды сезініп, өңір әлеуетін арттыруға атсалысуымыз керек, – дейді Жандарбек Төлегенов.
Шаруашылық төрағасының алға қойған мақсаты айқын. Алматы қала­сында білім алған азамат алдағы уа­қытта ауылдың көркеюіне өз үлесін қо­суға талаптанып отыр. Серіктестік жұ­мысы серпін алса, Аққұмға спорттық ны­сан салып беруді көздейді. Ту­ған жер­ге тағзым етуді қалаған Жандар­бек­тің талабына біз де сәттілік тіле­дік.

Кенжетай БАЛҒАБАЙ.
11 қыркүйек 2018 ж. 1 134 0