«Нұр Отан» партиясының «Ардагерлерді ардақтайық» жобасы аясында белсенді ұзақ өмір сүруге бағытталған орталық ашылды, – деп хабарлайды Kyzylorda-news.kz ақпараттық агенттігі.

Орталық аймақтағы «Достық үйінің» жанынан ашылды. Бұл партияның Қазақстан халқы Ассамблеясымен бірлескен іс-шаралар жоспарына сәйкес қолға алынып отырған игі шаралардың бірі.

Орталықтың негізгі мақсаты қазыналы қарттарымыздың тұрмыстық жағ­дай­ларын жақсартуға, әлеуметтік бел­сен­ділігін да­мытуға, бос уақыттарын қызы­ғушы­лық­та­ры­на қарай тиімді өткізуге сондай-ақ, олар­ды қоғамдық өмірге тарту арқылы қарым-қатынас жасау үшін қосымша жағдайлар жасауды көздейді.

Ардагерлер қауымын құттықтаған «Нұр Отан» партиясы облыстық филиалы төра­ға­сының бірінші орынбасары Ибадулла Құттықожаев орталық жұмысының қазіргі қоғамда «белсенді қарттықтың моделін» қа­лыптастырудағы рөліне тоқталып, арда­гер­лер­ді қолдауға бағытталған жұмыс­тарды атап өтті.

«Орталықта ұрпақтар сабақтастығын дамыту мақсатында ардагерлеріміздің жи­наған өмірлік және кәсіби тәжірибелерін сақтау мен қолдану мақсатында ментор­лар клубы да жұмыс жасайтын болады. Орталық жұмысынан бөлек біз зейнет жа­сын­дағы азаматтардың бос уақыттарын сау­ықтыру шараларымен өткізуіне жағдай жасау мақсатында облыс орталығындағы «Евразия», «Сейхун» спорттық сауықтыру кешендерімен және Жалаңтөс Бахадүр атын­дағы №1 облыстық мамандандырылған олим­пиадалық резерв мектебімен келі­сімдер жасадық. Енді зейнеткерлеріміз «Арда­гер­лер­ді ардақтайық» партиялық жобасы аясында аталған орындарда тегін және тұрақты түрде спортпен айналысуына болады», – деді Ибадулла Құттықожаев.