Жалағаш ауданының орталық алаңында бүгін жаңа жылдық шыршаның салтанатты жағылу рәсімі өтті. Мерекелік іс-шара Аяз Аталар мен Қаршақыздардың шеруінен бастау алды. Санаулы күндерден кейін Қазақ Елі жаңа 2018 жылға қадам басады.Елордамыз Астанадан бастау алған Жаңа жылдық шырша жағу салтанаты еліміздің барлық өңірлерінде өзінің жарасымды жалғасын табуда. Салтанатты рәсімде аудан әкімі Қ.Сәрсенбаев құттықтау сөз алып, ауданның өткен жылдағы толағай табыстарымен бөлісіп, аудан халқын санаулы күндерден кейін келетін Жаңа жыл мерекесімен құттықтады.
Аудан орталығынан орын алған мерекелік әсем шыршаның шамын облыстық, республикалық олимпиадалардың жеңімпазы, №38 А.Бисенов атындағы мектептің 11 сынып оқушысы Ж.Бекболат және жеңіл атлетикадан Қазақстан Республикасы чемпионатында найза лақтырудан 2 дүркін жеңімпаз, Қазақстан Республикасы чемпионатының Қысқы ойындарының қола жүлдегері №202 З.Жарқынбаев атындағы орта мектептің 10 сынып оқушысы А.Қайратұлы жақты.
Салтанатты шараға қатысқан көпшілік қауымға аудан өнерпаздары мерекелік көңіл-күй сыйлап, әсем әуенге бөледі.