Салауатты өмір – денсаулық кепілі
Орталық алаңда «Саламатты сандарға қол жеткіз!» ұранымен «Денсаулық фестивалі – 2019» акциясы өтті.Шараны аудандық аурухана бас дәрігерінің орынбасары Мұрат Нәрікбаев ашып, денсаулықты сақтау мен нығайтуға, салауатты өмір салтын ұстануға бағытталған акцияның маңыздылығына тоқталды.
– Еліміздің ұзақ мерзімді «Қазақстан-2050» даму стратегиясының ең маңызды басымдықтарының бірі денсаулық, білім алу мен Қазақстан азаматтарының әл-ауқатын арттырып, салауатты өмір салты мәдениетін қалыптастыру болып табылады. Осы орайда бүгінгі фестивальдің берері мол. Акцияның мақсаты – жұртшылықты салауатты өмір салтын ұстануға шақырып, қоғамның, бұқара халықтың назарын аудару, – дейді акцияға қатысушылар.
Орталық алаңға жиылған көпшілік жаппай жаттығу жасап, бойларын бір сергітіп алды. Сонымен бірге еріктілер мен медбикелер флешмоб ұйымдастырып, түрлі қимылдар арқылы да салауатты өмір салтын қалыптастыруға үндеді. Мұнан бөлек арнайы құрылған «Денсаулық» қалашығында аудан тұрғындары мен қонақтары медициналық жолдамасыз-ақ дәрігерлерге қаралып, түрлі диагностикалық тексерулерден өтіп, тегін жедел-анализдер тапсыруға мүмкіндік алды. Шара соңы түрлі мәдени-концерттік бағдарламаларға ұласты.
Н.АЛПЫСБАЙҰЛЫ.
